Te cu 4 aña castigo pa yuda persona ilegal

Ministerio di Husticia lo bay over na conduci casonan penal contra personanan cu ta facilita permanencia di hende ilegal na Aruba. Nan por spera castigo te cu 4 aña den prizon. Otro medida: lo bay cobra tur persona cu a para garantia pa personanan cu ta kedando ilegal na Aruba.

Minister di Husticia Arthur Dowers a anuncia esaki dialuna mainta cu lo persigui tur esun cu ta entre otro tumando placa pa regla documento y facilita tur aspecto di permanencia di hende ilegal. Nan a yega na un conclusion cu mester cuminsa ‘spierta’ esunnan cu ta sostene e entrada di hende y ta para garantia. “Te na momento aki Ministerio Publico no a actua contra esaki, pero aworaki  nos ta mirando un situacion caminda cu un persona ta bin akinan, keda y abusa di nos hendenan. Ta ora mi ta kere nos mester bin cu contestanan hopi fuerte pa esaki.”

No a keda mucha cla dicon Ministerio Publico no actua prome. 

Segun e minister ta asina cu siman pasa nan a yega na un discusion basta amplio riba e inmigracion ilegal di persona for di Latino America y cu ta keda riba nos pais. Esaki ta birando un discusion cu hopi biaha bo ta mira cu sea nan ta keda traha ilegal y tuma cupo di trabao di otro hende, como tambe esunnan cu ta keda y no ta traha anto ta persigui actividadnan criminal. Bon Dia Aruba a puntra e minister e ora si por duna cifra. E unico cos cu e por a bisa nos cu 15% di e criminalnan tin e nacionalidad Venezolano. Sinembargo e no por specifica di cual aña y si esaki a aumenta.

Lo cobra persona cu ta para garantia

Minister Dowers tambe a referi na un dama Venezolano na estado cu a fayece algun dia atras unda aparentemente no a busca tratamento na tempo pa motibo cu e ta ilegal y tabatin miedo. E persona cu a para garantia pa e dama aki a declara di cumpli cu tur gasto. “Esaki ta nifica cu e persona aki ta bay haya su mes cu gastonan di casi 10 mil florin of mas pa hecho cu el a firma e formulario aki.”

E ta haci un yamada na tur cu a para garantia pa busca e personanan cu nan a firma pa nan, pasobra gobierno ta bay cobra nan si e personanan ainda ta kedando na Aruba ilegal. “Si e persona no a cumpli cu nos reglanan y ta na e pais ainda,  pidi e pa bandona nos pais pasobra e riesgonan y costo ta bin na bo persona.”

Segun e mandatario tin casonan unda cu hende a bira malo caminda tabata tin costo di ariba 100.000 florin y esakinan ta cosnan pa tene na cuenta na dje cu ta gastonan cu abo lo mester bay cubri mirando cu abo ta esun para responsabel si e persona no tin manera di paga esaki. “Ora bo firma e formulario di garantia, bo ta declara textualmente cu bo ta para responsabel pa tur e costo y locual gobierno ta haci ta colecta e placa aki cerca e persona na luga di hiba e placa aki pa henter pueblo paga.”

Permanencia ilegal no ta castigabel

Permanencia ilegal na Aruba no ta castigabel sinembargo den nos codigo penal tin un articulo di traficacion di hende cual ta dirigi su mes riba proteccion di un victima. Un otro punto ta contrabanda di hende. Awor minister kier uza esaki contra hende cu ta yuda ilegal na Aruba y lanta un taskforce.

Pakico no tin cifra

Minister Dowers ta splica cu no por ofrece cifra exacto. Pasobra manera cu el a splica na varios ocasion caba, ora cu hende drenta nos pais nan no por wak si nan ta ilegal pero si nan por wak cuanto tempo nan a destina pa keda y si a keda mas dia cu esey. ”Nos no ta DIMAS, nos no por determina si e persona aki a haya un extension turistico , con largo e ta keda si e ta un permiso etc. E autoridad cu ta duna permiso mester bay ‘match’ e cifranan cu nos tin  anto nan por bisa si berdaderamente den e cifranan aki tanto hende ta legal of ilegal. Nos mes no por haci esey pasobra simplemente nos no tin e datonan.”

E posibilidad pa trece esakinan hunto, manera cu DIMAS y SVB por ehempel uni nan cifranan pa wak con nan por yega na algo, ta posibel, e minister ta admiti. Pero e datonan aki ta di nan pues e ta ultimamente keda den nan man. “Nan mester regla e cifranan. Nos cifranan tur ta ‘up to date’ den nos sistema. Si nan regel e cifranan nos por haci un calculacion. Nos sa cu tin hende cu ta keda y ta pa e motibo aki nos ta bay cuminsa na persigui esunnan cu ta facilitando cierto hende pa keda ilegal aki na Aruba.”