Telefon pa Hubentud Aruba yudando Colegio Papa Cornes di Bonaire

Ariba 15 y 16 di augustus Fundacion Telefon pa Hubentud Aruba tawata na Bonaire pa duna e ‘train the trainers’ di e proyecto” Prevencion di Termento na Scol” na personal di Colegio Papa Cornes. Despues cu den luna di Februari 2016 e directora hunto cu un trahado social a bishita Telefon pa Hubentud Aruba pa haya informacion, ariba 15 y 16 di augustus e personal di Colegio Papa Cornes a ricibi e training di TpH.

Despues di dos dia di training por bisa cu Colegio Papa Cornes ta cla pa implementa e proyecto aki den nan scol. Nan a keda masha contento cu e ayudo cu nan a haya di Fundacion Telefon pa Hubentud Aruba.

For di aña 2000 Fundacion Telefon pa Hubentud a wak cu e problematica aki ta serio bao di nos mucha y hobennan. E tempo ey caba a introduci un proyecto pa ataca e problematica aki. Despues di a haci un ‘desk research’  pa informacion mas durante dia y adaptacion di un proyecto Americano, den aña 2014 Telefon pa Hubentud a presenta e proyecto “ Prevencion di Termento na Scol “ na 8 scol basico na Aruba. E proyecto aki a wordo acompaña pa un estudio haci pa Oficina Central di Estadistica (CBS). A base di e resultado di e estudio aki por bisa cu e proyecto ta efectivo.

Den luna di september proximo Telefon pa Hubentud Aruba lo ta dunando e ‘train the trainers’ di “Prevencion di Termento na Scol na personal di scolnan na Aruba.