(AP) — Telescop espacial nobo di NASA ta cerca di completa e parti mas riesgoso di su mision – desdobla y preta un tapa solar enorme – despues cu controladornan na Tera a drecha un par di problema, segun oficialnan a bisa ayera.
E ‘sunshield’ di tamaño di un cancha di tennis riba e Telescop Espacial James Webb awo ta completamente habri y den proceso di keda preta. E operacion mester keda completo pa mañan.
E telescop di $10 biyon – e observatorio astronomico di mas grandi y mas poderoso cu a yega di lansa den historia – a despega dia di Pasco ultimo for di French Guyana. Su sunshield y spiel primario mester a wordo dobla pa fit den e raket Europeo, Ariane.
E sunshield ta vital pa tene e instrumentonan sensor di infrared di Webb na temperaturanan sub-cero, mientras nan ta scan universo pa e prome strea y galaxianan, y ta examina e atmosferanan di planetanan alien pa posible señalnan di bida.
Webb mester alcansa su destinacion 1.6 miyon di kilometer leu pa fin di januari. For di ayera, e telescop tabata mas cu na mita di caminda. E telescop infrared mester cuminsa observa universo pa fin di juni, finalmente desvelando e prome strea y galaxianan cu a forma den universo 13.7 biyon di aña atras. Esey ta apenas 100 miyon aña despues di e Big Bang cu a crea universo.
Lansa na 1990, Hubble, cu ta mira principalmente luz visible, a mira hasta 13.4 biyon aña leu. Astronomonan ta spera di cera e espacio cu Webb, cu ta 100 biaha mas poderoso.
Den otro bon noticia ayera, oficialnan a bisa cu nan ta spera cu Webb lo dura hopi mas cu e dies aña originalmente anticipa, basa riba eficiencia di combustible.
