‘Temperatura cayente tambe ta afecta kabel di Elmar causando varios storing ultimo tempo’

Jonathan van der Linden, Maintenance Specialist na NV Elmar ta splica cu berdad ultimo tempo Elmar ta confronta nan mes cu varios storing den e red di Elmar. Sr. Van der Linden ta splica cu tin varios factor y tin parti di calor cu ta hungando un factor grandi.

Ultimo tempo, comunidad di Aruba ta hayando su mes confronta cu varios problema cu coriente na diferente area di nos isla. Segun Elmar, e parti di calor ta afectando Elmar su red ultimo tempo, y no tanto den e parti di capacidad, pero tambe e kabelnan ta bao tera y ta wordo molestia hopi mas. Cualkier daño cu e kabel lo por a tin anterior, actualmente door di e calor e ta haya un kortsluiting anto ta afecta e area. Tambe tin temporada di yobida cu tambe ta afecta Elmar su instalacionnan. No solamente kabel, pero e instalacionnan di voltahe halto, e humedad ta subi den e area anto esaki ta afecta e instalacion.

Continuamente Elmar ta informa di ta haciendo mantencion riba e ekiponan, esaki ta algo cu ta purba mitiga e problema eynan. Tin temporada di mal tempo cu tambe ta afecta Elmar grandemente. Nan ta semper pone nan ekipo y personal cla pa ora e temporadanan aki ta andando. Na bo cas por ehempel bo tin un breaker box, anto bo tin un breaker ta bay pa e cushina, por ehempel. Den cushina bo tin 10 stop contact, si un di esakinan haya un kortsluiting, tur otro ta keda sin coriente. Esaki ta conta pa Elmar tambe pero den un escala mas grandi. Elmar su personal ta cuminsa na isola e problema pa despues reestablece suministro di coriente.

E humedad ta haci un efecto grandi tambe vooral anochi. Tambe por mira cu den e dianan aki rond 9’or di anochi e ‘peak’ ta halto pasobra tur hende ta yega cas, nan ta sende nan airco , tambe awor tin mas vehiculo di coriente, pues e demanda ta halto. Den e ultimo siman, Elmar a experiencia un ‘peak’ cu nunca nan a experiencia prome segun Sr. Van der Linden, e capacidad ta na 256 megawatt di transformer, kiermen tin suficiente espacio di capacidad. Pero aki aya tin incidentenan cu por pasa. Esaki ta cosnan cu por pasa full rond Aruba pues no ta cuestion cu un bario por wordo afecta mas cu e otro.