Recientemente, Merca a drenta e guera di Israel contra Iran na momento cu a tira bom di 30mil libra riba un sitio di enrikecemento di uranium diadomingo trempan, generando cuestionamento tocante kico ta resta di programa nuclear di Tehran y con su ehercito debilita por responde. Alabes, e participacion di Merca den e guera a eleva e nivel di alerta rond mundo, y sigur na Aruba, cu ta conta cu Merca como un partner clave den region.
Iran a reacciona na e atakenan bisando cu Merca a crusa “un linea cora hopi grandi” cu su decision pa lansa atake riba tres sitio nuclear Irani cu misil y bom cu ta destrui bunker.
“Merca a ataca nos; kico abo lo haci den un situacion asina? Naturalmente nan mester ricibi un respuesta pa nan agresion,” presidente Irani, Masoud Pezeshkian a bisa durante un yamada cu lider Frances, segun website di e presidente.
Memey di miedo di un conflicto regional mas amplio, administracion di Trump a manda un mensahe cla cu kier reinicia negociacionnan diplomatico cu Iran. Pero Tehran a bisa cu e momento pa diplomacia ya a pasa y cu e tin derecho pa defende su mes. Minister di Exterior Irani, Abbas Araghchi a bisa cu e lo bula inmediatamente pa Moscu pa coordina cu su aliado cercano, Rusia.
Cu e atake ehecuta sin deteccion, Merca a hinca su mes den un guera cu el a pasa decadas purbando di evita. Exito por nifica un fin na e ambicionnan nuclear di Iran y eliminacion di e ultimo menasa estatal significante na e seguridad di Israel, su aliado cercano. Fracaso por hinca Merca den otro conflicto largo y impredecible.
Mientras tanto, pa resto di mundo, e noticia a genera consternacion y preocupacion pa un economia global cu apenas ta na pia despues di inicio di e guera di Rusia na Ucrania. Esaki pa motibo di e restriccionnan di importacion di combustible y grano relaciona cu e guera aki. Y Aruba, como pais cu ta importa casi tur cos, y cu ta depende grandemente di Merca pa importacion y pa turismo, e desaroyonan geopolitico aki por tin un impacto grandi.
“Aruba ta sigui lineanan cu Reino ta stipula”
Recientemente, durante un conferencia tocante Economic Outlook di Aruba, minister di Asunto Economico, Geoffrey Wever (Futuro) a contesta pregunta di prensa tocante e impacto di desaroyonan geopolitico pa economia di Aruba. Specificamente, a puntra tocante e atake di Israel contra Iran.
Un preocupacion grandi pa hopi ciudadano di Aruba ta proximidad di nos isla cu Venezuela, un aliado di Iran, mientras cu un di e partnernan mas grandi di Aruba ta Merca, y Merca ta sosteniendo Israel den e conflicto. Contestando si esaki lo ta un motibo di alarma pa Aruba, minister Wever a bisa cu recordando cu loke ta trata relacionnan internacional (Buitenlandse Betrekkingen) ta un “prerogativo, un responsabilidad di Reino.”
“Den Statuut ta para cu e parti di relacionnan externo, dus foreign relations, ta un responsabilidad di Reino. Y den e sentido ey, Aruba por ehempel no ta tuma un banda den un conflicto internacional, of den caso di un guera of un conflicto politico,” Wever a bisa, agregando cu Aruba “ta sigui e lineanan cu Reino ta stipula pa cu esaki.”
Sinembargo, el a reconoce cu “naturalmente, conflictonan entre paisnan den cierto regionnan tin consecuencianan global, den sentido cu naturalmente nos no tin influencia riba esaki.”
Como ehempel, minister Wever a menciona cu un di e resultadonan di e guera entre Rusia cu Ucrania tabata cu prijs di petroleo a aumenta drasticamente, prijs di grano a subi drasticamente. “Anto anos como pais cu ta importa, ta sinti esaki directamente, prijsnan ta subi. Anto aworaki un conflicto entre Israel cu Iran, esaki por tin consecuencia pa esey tambe. Aunke na e momento aki e no a traduci ainda den e prijsnan cu nos ta wak awe.” Sinembargo, segun Wever, esaki ta algo cu ta monitorea tur luna, por ehemplo, e prijs di gasolin ta stipula basa riba e desaroyonan internacional. “Pero como gobierno nobo, [Gabinete] AVP-Futuro 1 di mei a dicidi di baha e accijns caba cu 10 cen, pa baha e prijs un poco. Dus den caso cu tin un aumento drastico, esey ta un di e tools cu nos tin cu nos por implementa pa laga un subida den mercado no ta mesun impactante pa e consumidor Arubiano.”
Teniendo tur esaki na cuenta, a identifica cinco punto di relevancia pa Aruba.
1. Dependencia economico riba Merca
Aruba tin un dependencia economico profundo y multifacetico riba Merca. Esaki ta inclui turismo, cu mas di 74 porciento di turista stayover den Q1 2025 biniendo for di Nort America, principalmente Merca. Cualkier interupcion den comportamento di biahe pa motibo di escalacion militar, miedo pa recesion of shock riba prijs di energia por afecta directamente entrada di turismo. Ademas, Merca ta e partner comercial mas grandi di Aruba. Den ultimo kwartaal, Aruba a importa Afl. 352.6 miyon den producto for di Merca, mas cu mita di tur importacion. Tambe mester recorda cu Florin Arubano ta mara na e Dollar Mericano, loke ta nifica cu Aruba ta hereda for di Merca su presion inflacionario, cambio den tasa di interes y sentimento financiero global mara na movidanan di politica Mericano. Pues ora Merca ta drenta conflicto, hasta indirectamente, Aruba ta sinti esaki rapidamente a traves di aumento di prijs, cadena di suministro, decision di biahe y sentimento di inversionista.
2. Prijs di petroleo
Manera menciona, tension geopolitico den Medio Oriente, specialmente involucrando Iran, historicamente a impulsa aumento den prijs di petroleo. Iran ta controla puntonan clave di transito manera e Estrecho di Hormuz, door di cual alrededor di 20 porciento di petroleo global ta pasa. Si e conflicto escala, Aruba por enfrenta costo mas halto pa gasolin, diesel, y utilidad, ya cu ta importa tur petroleo refina. Den conflictonan global anterior, (e.g. Ucrania-Rusia), inflacion na Aruba a aumenta pa aumento global di prijs di energia, cu inflacion alcansando 5.5 porciento na 2022.
Maske e inflacion actual ta mas abao (1.4 porciento den prome kwartaal di 2025), Aruba ta keda altamente vulnerable na shock den prijs di materia prima. Un aumento di prijs di azeta di hasta 10 of 15 porciento por elimina e esfuersonan di gobierno (manera e rebaha di 10 cen riba accijns) pa suavisa aumento di prijs.
3. Sensibilidad di sector turismo
Maske prohibicion directo di biahe of miedo di guera probablemente no lo pone turista Mericano keda leu, e efectonan psicologico y financiero por conduci na menos reservacion si sentimento di consumidor Mericano ta baha of tarifa pa combustible di aerolinea ta aumenta; tambe por resulta den aumento di prima di seguro of reduci cantidad di vuelo.
Den prome kwartaal di 2025, mas di 82 porciento di turista stay-over na Aruba a bin di Nort y Latino America combina. Un reduccion den biahe saliendo for di Merca por tin un impacto fuerte riba e sector aki – y asina riba ocupacion di hotel, empleo den hospitalidad, y inversion priva.
4. Inflacion impulsa pa importacion y presion comercial
Economia di Aruba ta sensitivo pa importacion, ya cu ta trece casi tur cos, di cuminda pa remedi te material di construccion, mayoria di esaki door di Merca. Esaki por nifica interupcion den ruta di transporte pa motibo di inseguridad regional, aumento di costo di seguro y transporte. Prioridad duna na cadena di suministro domestico di Merca por conduci na aumento di prijs of escasez na Aruba. Esaki lo afecta categorianan di CPI manera cuminda, cual su prijs ya a aumenta cu 22.5 porciento YOY den prome kwartaal, of construccion.
5. Rol di Venezuela
Mientras cu Aruba ta mantene neutralidad mediante Reino Hulandes, su proximidad geografico na Venezuela, un aliado declara di Iran, ta introduci sensitividad geostrategico. Si ta percibi e region como instabiel, confiansa di inversionista por baha, por bin obstaculo nobo di seguridad pa operacion logistico (manera maritimo y cargo). Balansa diplomatico ta bira crucial den e situacion aki, specialmente si Merca presiona su aliadonan regional pa “scoge un banda” economicamente.
Maske Aruba ta deferi na politica exterior na nivel di Reino, cualkier percepcion robes di riesgo por afecta financiamento externo, FDI y hasta coordianacion entre Hulanda y Merca riba asunto financiero.
Na final, Aruba mester monitor tendencianan global mensualmente, manera minister Wever a enfatisa, y actua rapidamente pa protege consumidor mientras ta reforsa su neutralidad diplomatico y resiliencia comercial.
