Den su reaccion riba e tercer reporte financiero di gobierno di Aruba pa 2022, cu ta cubri e tercer trimester di e aña (Kwartaalrapportage 3-2022), cu a keda publica recientemente, e organismo di supervision financiero ta observa cu den sentido general e resultadonan financiero ta move dentro di e cuadro stipula pa presupuesto 2022, modifica bayendo fin di aña, aunke ta señala tambe algun obstaculo.

Entrada

Entrada di gobierno pa loke ta impuesto ta cumpli cu e norma di alrededor di 75% di e total anual anticipa. Impuesto directo ta na 76% di loke a proyecta, principalmente pa cobranza extra di ‘overdrachtsbelasting’ (impuesto riba traspaso di propiedad inmobil). Di otro banda ta señala cu tanto impuesto riba salario como impuesto riba ganashi a keda atras, tumando na cuenta e recuperacion economico, cu practicamente lo a yega na nivel di 2019, e aña di referencia pre-Covid. Segun CAft no a haya un splicacion convincente di gobierno riba e tema aki. Tocante esey mas detaye den un articulo redaccional acompañante.

Por lo demas, accion di cobranza y benta di hopi propiedad (vivienda) cu persona di exterior a aumenta entrada di grondbelasting y overdrachtsbelasting, cu lo resulta na fin di aña mas halto cu loke a proyecta inicialmente.

Den impuesto indirecto e beneficionan mas grandi ta bin di mehoracion di BBO/BAVP y di impuesto di importacion, cu ta mas halto cu loke a proyecta. En total entrada di impuesto indirecto ta den linea cu loke tabata anticipa pa 2022 y cu e nivel ta practicamente loke e tabata na 2019. Den e categoria di demas entrada, un parti ta dividend di entidadnan estatal, pero tambe pago back di subsidio di salario cu SVb mester manda pa gobierno. Aki a surgi un incertidumbre pasobra SVb no a paga gobierno e Afl. 49 miyon pero a desconta esaki di loke gobierno debe e fondo. Aunke CAft no ta bisa esey cu tanto palabra, otro fuentenan ta indica cu esey ta subsidio di salario cu SVb a paga adelanta, sin haya pago di gobierno. CAft ta pidi un aclaracion di e asunto aki. En todo caso esaki a causa cu na fin di september entrada cu no ta impuesto a yega solamente na 54% di loke tabata proyecta.

 

Gasto

Gasto di personal na september ta mustra den linea cu e proyeccion, pero CAft ta señala cu gasto di overtime a aumenta den e periodo aki. Ta mira un riesgo aki cu no ta cumpli cu e limite maximo pa gasto di personal, a menos cu gobierno haci algo, por ehemplo ‘top off’ e compensacion pa overtime.

Den e categoria di bienes & servicio por a observa un ‘onderbesteding’ (no uso di e fondonan destina). A usa solamente Afl. 137 miyon di e presupuesto di Afl. 216 miyon, 63% di e suma presupuesta pa 2022. Caft ta mustra riba un uso mas abao structural y ta conseha gobierno pa den presupuesto 2023 tene cuenta cu esaki.

Sector colectivo

Pa loke ta e entidadnan cu ta parti di sector colectivo, AZV tin un deficit di solamente Afl. 0,4 miyon, cu e anuncio acerca cu di e Afl.60 miyon di austerizacion acorda cu Hulanda, ta logra solamente Afl. 41 miyon. Ademas CAft a comprende cu e recorte di 5,5% riba e budget di e proveedornan di servicio ta keda suspendi pa luna di december, loke ta haci cu e suma cu ta logra spaar ta baha te na Afl. 39 miyon. CAft ta haya esaki preocupante pasobra e reduccion di 5,5% riba base anual ta duna un beneficio di Afl. 20 miyon, y ta haya corta e budgetnan aki di importancia crucial. Esaki por conduci na decision di Conseho di Ministro di Reino pa laga Aruba bin cu austerizacion adicional, segun CAft.

Den e sector colectivo ta figura tambe Serlimar, cu na fin di september ta mustra un surplus di Afl. 5 miyon, pero riba base anual segun CAft e deficit na Serlimar ta Afl. 4 miyon. No ta duna un splicacion di esaki. Tambe Stichting EPB ta anticipa un deficit di Afl. 2 miyon; tambe sin splicacion. Ta pidi gobierno pa en todo caso den e ultimo rapport financiero di 2022 duna un splicacion di e casonan di deficit aki y ta mustra riba e importancia di medida structural pa limita e deficitnan na Serlimar y SEPB. Segun articulo IX di e protocol di 2 di mei di 2015, lo mester tabatin e sector colectivo stipula caba pa 2022 y 2023. Aruba a entrega un proposicion pa e sector colectivo na ministerio di Asunto di Interior y Relacion di Reino na inicio di 2022. Awor ta na gobierno Hulandes pa atende e asunto, loke aparentemente tambe ta tarda. CAft a urgi gobierno Hulandes pa atende e asunto cu prioridad.

Inversion

Aruba tin un suma di Afl. 24 miyon den presupuesto pa inversion. Te cu fin di september a usa solamente Afl. 6 miyon. CAft ta haya esaki un fenomeno indesea di inverti demasiado poco mientras cu e placa ta presupuesta. Ta conseha Aruba pa acopla e suma mihor na e capacidad di ehecucion cu e pais tin. Tambe ta observa cu den e tercer trimester Aruba su posicion di liquidez a mehora cu Afl. 100 miyon, mientras no a splica kico a ocasiona esaki. Den e ultimo kwartaal gobierno a cera un prestamo di bono di estado pa un suma di Afl. 80 miyon. E falta di informacion den e asunto aki ta dificulta pa CAft evalua e prestamo menciona. Ta pidi gobierno pa esclarece esaki, y indica tambe kico ta e gastonan di interes pa 2023 y si nan ta poni caba den presupuesto 2023.

Posicion di debe

Na fin di september e rapport ta mustra un necesidad di financiamento di Afl. 365 miyon. E presupuesto 2022 modifica ta mustra un necesidad di Afl. 1.113 miyon, consistiendo di deficit riba presupuesto y resultado di ‘kapitaaldienst’, di en total Afl. 92 miyon, y e prestamonan di alrededor di Afl. 1.000 miyon. Na 2022 a yega na un acuerdo cu Hulanda cu ta haci un refinanciamento di e prestamonan di liquidez di Afl. 916 miyon, te october 2023. Asina e necesidad di financiamento pa 2022 ta Afl. 197 miyon (Afl. 92 miyon pa deficit presupuestario y Afl. 105 miyon na debe local cu ta madura. E prestamo anuncia cu bono di Afl. 80 miyon ta pa paga atraso cerca suministradornan empresarial. E debe total di gobierno ta na fin di 2022 Afl. 5.816 miyon. E corelacion entre debe publico/GDP ta na 93 porciento di Producto Interno Bruto (PIB, GDP). Segun CAft, esey ta hopi mas halto cu e limite critico di 70 porciento di GDP.