No spera pa mira nomber di The Weeknd riba lista di nominacion di Premionan Grammy por lo pronto. Apenas algun dia prome cu e Grammys ta programa pa tuma luga, The New York Times a revela cu The Weeknd – nomber legal Abel Tesfaye – lo boycott e show di premio bayendo dilanti despues cu no a nomina su album ‘After Hours’ ni su single ‘Blinding Lights’.

“Pa motibo di e comitenan secreto”, Tesfaye, di 31 aña di edad, a bisa e corant, “mi no ta bay permiti mi label entrega mi musica na e Grammys mas.”

Respondiendo na su declaracion, Harvey Mason Jr. – hefe ehecutivo interino di e Recording Academy – a bisa cu ‘nos tur ta decepciona ora un hende ta molesto’, pero a declara cu ‘nos ta evolucionando constantemente’.

“Y e aña aki, manera den añanan pasa, nos ta bay mira con pa mehora nos proceso di premio, incluyendo e comitenan di revision di nominacion”, Mason a splica.

Despues di critica di Drake y Frank Ocean entre otro, e Academia a haci esfuerso pa diversifica su miembresia y hasta a contrata un oficial di diversidad y a trece mas muhe y hende color scur den su liderazgo, segun e corant.

E declaracion nobo di The Weeknd ta yega algun luna despues cu e cantante Ethiopio-Canades a acusa e Recording Academy di corupcion na momento cu a laga su musica completamente fuera di e nominacionnan 2021. Despues cu a revela e nominadonan, Tesfaye a kibra su silencio pa critica e show di premio. “E Grammys ta keda corupto”, el a skirbi e tempo aya. “Bo debe mi, mi fanaticonan y e industria transparencia…”

Tiki despues, artistanan incluyendo Drake y Halsey a defende e cantante di ‘Starboy’, criticando e show di premio mas ainda.

Fin di januari, pa un relato den Billboard, e cantante a bisa cu su tres Grammy – pa Starboy, Beauty Behind the Madness, y Earned It – no ta nifica nada p’e.

“Un atake”, el a bisa di e falta di nominacion. “Pasobra el a djis dal mi diripiente. Definitivamente mi a sinti… mi a sinti algo. Mi no sa si tabata tristesa of rabia. Mi ta kere tabata djis confusion. Mi tabata kier contesta, manera, ‘kico a pasa?’”

E cantante a bisa cu e ‘personalmente no ta worry mas’ cu e situacion.

“Mi tin tres Grammy, cu no ta nifica nada pa mi awo, obviamente. No ta manera ‘oh, mi kier tin e Grammy!’ Ta djis cu esaki a pasa, y mi ta dispuesto pa bay den candela, tanten cu esaki no pasa atrobe”, el a bisa.

“Mi ta pesimo pa duna discurso”, el a agrega. “Lubida di show di premio.”

E Premionan Grammy ta programa pa transmiti en bibo for di Los Angeles diadomingo proximo, pa 8pm ET of 5pm PT riba CBS y Paramount+.

LEAVE A REPLY

Please enter your comment!
Please enter your name here