Entrevista Zimmerman Ms Amsterdam (1).jpg

Thessaly Zimmerman ta un hoben Arubiano di 22 aña studiando Media na Hulanda. Conoci den mundo di beyesa na Aruba, Zimmerman ta conta nos matutino tocante e diferencianan entre Aruba y Hulanda ora ta yega na competi den e mundo aki.

 

Zimmerman ta comenta “Mi a wordo introduci na mundo di beyesa pa medio di modela. Mi a competi cu Aruba Model Search na 2010, eynan ta unda mi a cuminsa haya exposicion y pa medio di e exposicion ey mi a wordo acerca pa competi na Miss Teen Aruba International. Na 2012 mi a representa Vice Versa y mi a gana. Cual tabata algo cu mi no a spera pasobra mi tabata competiendo contra 12 otro cantidata y mi no tabata tin experiencia. Mi tabata sinti manera un “underdog” memey di nan. Despues di esey mi a competi na El Salvador y mi a sali first runner up. Pues asina mi a cera conoci cu e mundo aki y mi a siña asina hopi. E tabata algo completamente diferente di locual mi a spera”.

 

Hulanda tin mas diversidad

 

Segun Zimmerman, no tin mucho diferencia den e mundo di beyesa entre Aruba y Hulanda.
Solamente cu Hulanda, tin menos enfoke riba e parti fisico y mas riba personalidad. Tambe e contexto cultural di Hulanda ta otro.

 

“Na Hulanda tin hopi mas diversidad, porta paso ta Amsterdam pero e cantidatanan cu mi ta competi contra nan, niun ta completamente Hulandes. Sino un mescla di diferente cultura y esey ta haci e competencia hopi mas leuk. E ta bay mas tanto riba con bo ta representa bo mes. Nos no tin cu modela den bikini y cosnan asina. Nan ta tras di personalidad.
E unico cos cu ta haci cos dificil pa mi ta e Hulandes, mirando cu mi estudio ta na Ingles y na scol den klas nos ta papia Ingles y mi ta papia Papiamento cu amigonan di Aruba. Pues aunke mi ta comprende tur cos, mi ta struggle pa expresa mi mes. Mi ta mas confortabel papiando na Ingles. Pero e solo echo cu mi por conoce hende nobo y cera amistadnan ya caba ta pone mi sinti manera cu mi a gana. Semper mi ta drenta cu e mentalidad cu mi ta bay pa disfruta di e experiencia y no pa competi” Zimmerman ta remarca.

 

Beyesa no ta tur cos

 

Hopi hende tin e tendencia di kere cu pa participa pa competencianan di beyesa bo djies mester tin un curpa y un cara bunita. Zimmerman ta insisti cu e no ta asina.

“Claro cu bo porta bo mester mustra cierto manera pa bo por competi, pero ora bo yega eynan, bo ta wak cu e ta algo cu ta tuma hopi tempo y dedicacion. Ora hende cuminsa sigui bo y cheer pa bo, nan lo haci esey pa ken bo ta como persona. Bo mester ta sumamente inteligente tambe. E ta importante pa tin algo mas pa ofrece cu djis beyesa.”