(AP) – E Union Europeo su brasa ehecutivo a bisa ayera cu a tuma e decision di temporariamente prohibi TikTok for di e celularnan usa pa e empleadonan como un medida di siguridad cibernetico, reflehando e preocupacionnan cu ta keda amplia contra e aplicacion di doño Chino.

Den un decision prome di su tipo pa e Comision Europeo, su Corporate Management Board a suspende e uso di TikTok riba celularnan of dispositivonan duna na empleadonan y hasta esunnan personal cu e empleadonan ta usa pa trabao.

TikTok ta enfrentando critica cu ta den aumento di parti di Merca y Europa tocante preocupacionnan cu e aplicacion sumamente popular por ser usa pa promove ideologianan pro-Beijing of usa informacion di usuarionan. Esaki ta bini den medio di temponan unda China y demas paisnan den e parti West ta den un guera tocante tecnologia. E union su accion ta bini despues di movidanan similar na Merca, unda mas di mita di e estadonan y Congreso a prohibi Tiktok riba dispositivonan gubernamental.

“E motibo dicon e decision aki a ser tuma ta pa aumenta e comision su siguridad cibernetico,” vocero di e comision Sonya Gospodinova a bisa na un conferencia di prensa na Brussels. “Tambe, e medida aki ta pa proteha e comision di menasanan di siguridad cibernetico y accionnan cu por ser explota pa atakenan cibernetico contra e ambiente corporativo di e comision.” Caroline Greer, ken ta TikTok su oficial di politica publico basa na Brussels, a publica cu e suspension aki ta “mal guia y basa riba mal conceptonan fundamental.”

“Nos a pidi un reunion, pa aclara tur cos,” el a bisa, agregando cu Tiktok cual tin mas di 125 miyon usuario den e Union Europeo, ta sigui “purba mehora” su strategia pa cu siguridad di data. Esaki ta inclui habri 3 centro di dato na Europa y minimalisa e data cu ta ser manda fuera di e continente.

Voceronan di e Comision a nenga di splica ki incidente specificamente a causa e suspension ni tampoco a agrega ki accionnan TikTok mester tuma pa retira e suspension aki. Actualmente, empleadonan mester kita TikTok for di dispositivonan cu nan ta usa pa cualkier topico profesional pa dia 15 di maart, segun representantenan a splica , aunke no a provee detaye tocante con esaki lo ser aplica pa personanan cu ta usa nan dispostivo personal pa trabao.