Recientemente parlamentario Dangui Oduber di fraccion MEP a trece dilanti e topico di structura di salario nobo pa maestronan durante un conferencia di prensa. E parlamentario a lamenta cu e actual minister di Enseñansa, Gerlien Croes, a scoge pa institui un grupo di trabou nobo pa inicia cu tur trabou di nobo cu lo nifica cu maestronan mester warda mas tempo pa un structura di salario nobo.

Parlamentario Oduber a indica cu scuchando minister di Enseñansa Gerlien Croes bisa cu e no ta di acuerdo cu e conseho cu a ser laga atras pa ex minister Endy Croes y cu e lo mester institui un grupo di trabou nobo pa cuminsa e trabounan di nobo pa presenta un structura di salario nobo pa e maestronan, e ta “lamenta” y “condena” e actitud di e mandatario.

Oduber a splica cu e trabounan pa un miho structura di salario a cuminsa na 2023 na momento cu ex minister di Enseñansa Endy Croes a institui un grupo di trabou cu tabata consisti di DRH, Directie Financien, DPS y SKOA, y cu a consulta cu full e veld di enseñansa. El a sigui splica cu e ex mandatario a laga atras un dossier y a percura pa laga atras tres opcion pa e minister Gerlien Croes scoge di dje.

“Es mas no solamente nos a laga e documentonan atras cu e opcionnan, pero nos a percura pa laga presupuesto atras pa paga e maestronan un miho structura di salario. Ora mi scucha minister Gerlien Croes ta bisa cu nos no a laga placa atras, mi ta bisa nos a spera diferente, nos a spera un politica nobo, nos a spera un politica moderno, nos no a spera un politica di manipulacion y engaño,” parlamentario Oduber a expresa.

El a señala cu esaki no ta cuadra pasobra cada rato nan ta scucha minister di Finanzas Geoffrey Wever papia di cuanto placa pais Aruba tin. Oduber a indica cu tin un surplus di 500 miyon florin, pero prioridad di e minister di Enseñansa actual no ta e docentenan manera el a priminti durante campaña caminda el a bisa cu na momento cu partido Futuro drenta gobierno, e maestronan lo haya un miho structura di salario.

“Nan prioridad ta diferente pasobra tin placa pa funcionnan cu ta ser crea. Nan a crea funcionnan manera diplomatico cultural, mara na un salario di 15 mil florin pa luna. Nan a caba di haci cambio den e presupuesto pa 2025, pero no inclui ningun cambio pa mehora e structura salarial di maestro,” el a agrega.

Parlamentario Oduber a señala cu ora na repasa e lista di salario cu e gobierno aki ta paga esnan rond di nan, ta un motibo di preocupacion di parti di cada miembro di parlamento pasobra nan ta mira con un facilitaire medwerker ta cobra un salario di nuebe mil florin y un bode ta cobra seis mil florin.

“No tin placa pa e docente, no tin placa pa e maestro, tin cu institui un grupo di trabou nobo pa bay haci full e trabou di nobo. E no ta presupuesta placa pa paga docentenan, pero tin nuebe mil florin pa un facilitaire medewerker,” el a menciona.

Oduber a splica cu e salarionan menciona ta loke gobierno a comparti cu parlamento durante tratamento di presupuesto complementario, caminda nan a duna e lista como pa Parlamentarionan mira y asina por a haya e informacion y a skirbi tur e salarionan.

“P’esey nos ta condena severamente e actitud di minister di enseñansa Gerlien Croes pasobra e tin e rapport, e tin e consehonan, y e tin e placa. No bin sconde tras di e hecho cu no tin placa,” el a agrega.

Segun e parlamentario, minister Geoffrey Wever a bisa cu den e prome kwartaal di aña 2025 gobierno a haya 400 miyon florin extra y ademas di esaki Gabinete Wever-Croes a laga atras 500 miyon florin di surplus pa asina por cumpli cu e maestronan cu tin añas, decadas, ta warda pa un miho structura di salario.

Manera ta conoci fraccion di MEP a presenta un mocion den parlamento pa asina expresa nan deseo y pidi gobierno haci e cambionan mas pronto cu ta posibel pa mehora e structura salarial di maestronan, pero ni fraccion di AVP ni di Futuro a sostene e mocion.

“Un mocion asina importante pa docente cu ya caba cu 38 aña ta yega nan plafond, cu tin cu para dilanti klas tur dia cu hopi stress, hopi presion, hopi tension, tin cu yuda muchanan banda di duna enseñansa y educacion, tin cu maneha problemanan social continuamente den klas, nan cu merece e atencion no tin placa pa nan, pero tin placa pa biaha, tin placa pa fiesta, tin placa pa coordinadornan, tin placa pa tur otro cos menos pa e docentenan,” Oduber a expresa.

E parlamentario di fraccion di MEP a indica cu na e momentonan aki tin placa, referiendo na e surplus di 500 miyon florin, pero gobierno mester fiha su prioridadnan, y segun parlamentario Oduber fraccion di MEP a constata caba cu e gobierno aki su prioridadnan ta totalmente robes pasobra mientras tin 500 miyon di surplus, nan a corta algun miyon den enseñansa, a corta den muchanan special, no a cumpli cu e pensionadonan y a corta 20 miyon florin for di FCCA pa construccion di casnan social.

“Nos ta condena e maneho cu e gobierno aki ta hibando pasobra nos ta considera cu e maestronan mester ser trata cu dignidad, e maestronan mester ser trata cu respet, nan ta nos educadornan, nan ta duna educacion pa forma e pais aki pa e futuro di mañan,” el a remarca.

Parlamentario Oduber a trece dilanti cu nan a mira un carta di Sindicato di Maestro di Aruba (SIMAR) den cual ta bisa cu te dia 29 di september minister di enseñansa a concede un reunion cu nan. El a subraya cu despues cu Futuro tin casi ocho luna den gobierno, cu a haci cambio den presupuesto y lubida maestro, apenas ta bay sinta cu e sindicato di maestro. “Nos ta considera esaki un falta di respet pa e veld, un falta di respet pa e docentenan,” el a enfatisa.

Por ultimo, Oduber a indica cu ora di tratamento di presupuesto fraccion di MEP ta bay bolbe presenta un mocion y por ta te hasta nan ta presenta un amienda pa loke ta trata e structura di salario nobo pa maestro pasobra teniendo na cuenta cuanto placa gobierno tin na e momentonan aki, el a subraya cu lo ta mas cu husto y mas na su luga pa cumpli cu e maestronan enbes di bay haci e trabou full di nobo y laga nan warda un pa dos aña mas pasobra e e tipo di trabounan ey ta tuma tempo.