Pueblo di Aruba, semper ta bon pa bo mes como conciudadano, saca e som di tur asunto gubernamental. E biaha aki esey mester ta den e caso di Minister Sevinger cu ta declara cu e no a privilegia sra. Leoncita Arends. Prome cu tur cos, mester analisa con e proceso ta pa bo por saca un conclusion si por papia di privilegio, si of no! E asunto ta cu sra. Arends ta registra un negoshi nobo na Camara di Comercio.
Directamente despues, su persona ta manda pidi informacion di terenonan disponibel cerca sr. Every y sr. Franklin Abath. Esaki nan ta indica sra. Arends cua terenonan e mester pidi cerca Minister Sevinger. Carta di peticion ta bay pa e Minister y no den e forma oficial. E minister ta firma di biaha, comprometiendo gobierno di Aruba, riba e carta di peticion. E standard cu sr. Sevinger ta uza ta: Dezerzijds accoord.
Gaarne medewerking. Cu e carta firma pa e minister, sra. Arends ta bay na un interesado den e tereno, y ta bende e compania registra hunto cu e peticion di dicho tereno firma pa e Minister pa 700.000 florin, 1 miyon dollar of mas. Esey ta loke ta haci e asunto un corupcion y fraude total. Manera mi welo tabata bisa: cacho cu mata carne ta keda mata carne pasobra nan ta gusta e sanger. Sra. Arends ta sigui e procedura aki via mas familiarnan di dje. Entre otro rumannan, sobrinonan y sobrinanan y otronan yega na famia Arends.
Si e echo cu ta solamente sra. Arends y su famia y e contactonan ta keda haya e terenonan, no ta privilegio, kico otro ta privilegio anto? Si e placa haya di e benta di e compania riba papel cu e peticion firma pa Minister Sevinger no ta corupcion y fraude, kico ta corupcion y fraude anto? Tambe mester menciona cu e mafia di tereno aki ta hinca completamente bao di e signatura Berde. Corupcion ta berde di mes! Minister Sevinger ta di AVP, sra. Leoncita Arends ta AVP, sr. Every y Franklin Abath ta berde, e manager na DIP (ex Domeinbeheer) ta casa di Parlamentario Dammers di AVP. Pa colmo, e minister di Husticia bao di cual opsporings- en vervolgingsbeleid (investigacion y persecucion hudicial) ta cay ta sr. Dowers di AVP. O.M na Aruba tin yiu di difunto Piet Pronk ta traha aden.
Ruman di Minister Schwengle ta traha aden, yiu muhe di Parlamentario Baba Herde ta traha aden. Pues, unda hende por acudi pa haya husticia? na cas di partido? No por papia di privilegio so pero tambe di corupcion y fraude berde, di mes. E asunto ta un privilegio coruptivo y di ladronicia di tereno, si of no? Puntra Otmar y husga pa bo mes Aruba.
