Despues di e reunion cu presidente di ATIA, Ronald van Trigt a sostene cu representante di Astec riba e incidente cu a presenta den waf di Barcadera, caminda un barco di container no por a baha su carga pa comercio local, tur cos a wordo aclaria. Sinembargo lo bin cambio pa evita cu un situacion similar no presenta mas.
ATIA a vocifera su preocupacion, ya cu e proceso aki di transporte y bahamento di carga ta uno di suma importancia pa economia di Aruba. Sr. van Trigt a bisa cu ta importante pa bin cu un metodo pa nos tin un sistema productivo y eficiente pa drenta carga. “Carga ta un di e proceso mas importante pa comercio di Aruba.”
Palabracion
Nan a palabra cu Astec cu ora cu tin temporada unda e fluho di container ta subi, pa den un fase mas tempran, nan ta bay den un comunicacion mas habri. Ya cu no solamente ta december, sino cu tin otro temporadanan di aña cu ta crucial pa Aruba su comercio pa garantisa un fluho eficiente y productivo. Den e caso aki, ATIA a palabra cu Astec cu lo sinta cu nan pa sigura nan mes cu e comunicacion cu tur partido specialmente den e temporada druk di carga aki.
Si algo ta pasa cu carga no ta drenta, e ta haci un efecto enorme riba comercio y den su condicion di presidente di e gremio aki, el a vocifera su preocupacion specialmente den e luna aki. “Nos a vocifera cu specialmente na december. Esey ta haci extra dolor ora cu mas cu 140 container no ta yega Aruba.” E barco a bay Corsou pero tres dia despues finalmente a drenta waf di Barcadera pa baha su carga. Pues tres dia di retraso cu tabatin su efecto tambe pa comercio. P’esey nan a priminti cu nan lo sinta cu Astec y den nan combersacion cu a tuma luga dialuna ultimo, unda varios punto a wordo aclaria.
El a bisa cu Astec tabata basta habri den nan splicacion. Nan a duna un splicacion detaya tambe riba e posibilidad pa tin mas cu un barco den waf. Astec como e compania cu ta baha e carga nunca a yega di uza e grua shen porciento, sino cu e ta wordo uza den un averahe di 35% so. Aunke nos ta un isla chikito, pero mirando loke Astec a mustra kico ta nan productividad y eficiencia cu nan tin, e ta bay wordo importante pa tur partido comunica cu otro di un forma eficiente y transparente, segun sr. van Trigt.
E prome informe cu Atia a haya tabata indica cu tabatin varios motibo pa kico e barco a bay Corsou. Pero despues nan a bin compronde ‘cu den e caso specifico aki Astec no tabatin parti of culpa’ riba e decision pa e barco bay Corsou. Sr. van Trigt a bisa cu e decision aki a wordo tuma pafo di e circulo di Astec mes. E barco tabata laat y e partidonan tabata na altura di esaki. Den e caso aki el a splica cu si tin otro barco cu si ta na tempo den waf y e ta wordo descarga. Sinembargo den e caso di e barco cu a yega laat tabatin e opcion di laga e barco drenta mas laat atardi, y evita henter e polemica cu a surgi rond di e incidente aki.
Vulnerabilidad y comunicacion
E incidente aki a mustra e vulnerabilidad di nos pais di ta dependiente di varios partnernan pa e proceso di carga via maritimo cana. E ta haya cu e ta un proceso basta complica compara pa ehempel cu un transporte aereo. E transporte di carga ta demanda mas planificacion. Den nos caso, ora e planificacion ta bay robes, no tin otro manera cu keda warda bo boor, el a bisa. Pero den e caso aki e partidonan a dicidi otro. Nan a bay Corsou y bin bek Aruba, tres dia despues.
Presidente di ATIA a elogia cooperacion di cuerpo di Duana, ya cu nan tabata excelente. Duana a haci un bon preparacion y nan a coopera ariba un diasabra siman pasa cu e barco a drenta nos waf, y baha e containernan y acomoda nan. Mirando cu bon planificacion ta hunga un rol pa un incidente similar no bolbe sosode, Atia ta bay sostene diferente comunicacion cu e otronan partnernan envolvi. “Mi ta kere cu esaki ta un trabou cu mester wordo haci conhunto.”
E ta reitera cu pa comercio ta importante pa e proceso aki cana bon y unda e comunicacion ta crucial. Ya cu tin biaha Astec ta haya informacion di parti di companianan di barco cu no ta completamente corecto. Nan ta informa cu e barco ta bay drenta cierto ora, pero ta resulta cu e barco ta drenta mas laat, locual ta causa basta reto pa Astec.
P’esey presidente di ATIA a señala cu como gremio nan lo bay tuma un poco mas di responsabilidad pa bay papia cu mas partidonan envolvi y asina bin cu un comunicacion mas transparente.
