Dia 8 di maart lo conmemora na nivel mundial Dia Internacional di Hende Muhe. E aña aki e derechonan di hende muhe y igualdad di genero ta hayando mas atencion rond mundo.

Pa e motibo aki, durante un entrevista special pa Bon Dia Aruba tocante e dia aki, nos a papia cu Titi Tromp cu ta un persona masha conoci na distrito Noord, pa su aporte na cultura y carnaval di Aruba.

El a expresa su experiencia como hende muhe di decadanan pasa, unda el a representa e Dama di Cultura un biaha na distrito di Brasil. El a conta cu esaki tabata un experiencia ‘hopi dushi’, aunke e no ta corda e fecha.

‘Titi’ manera e ta conoci den comunidad, a participa den carnaval pa 43 aña. El a conta e historia con carnaval a cuminsa como algo chikito den cunucu di un cas. Aña 1965 tabata su prome aña como participante y ta conta cu despues su yiu ‘Miertje’ a crea un grupo di scol Cayena cu pa hopi aña nan a keda organisa esey pa e muchanan.

Tocante e situacion actual di hende muhe, el a bisa cu nan a logra basta den tur area, no den tur cos pa motibo cu tin algun hende muhe cu ta depende di otro cosnan, pero compara cu antes e situacion a cambia, nan a logra basta.

“Antes e hende muhe no tabata mag di haci nada, tur cos tabata depende di nan casa y nan no tabata traha, nan mester a keda cas pa atende nan yiunan,” asina el a expresa.

Tocante hende grandi, Titi a comenta cu tanto hende muhe como hende homber grandi ta sufri igualmente na e momentonan aki: “tur hende tin derecho pa biba un bida sano y stabiel, pero tin ora hende grandi ta pasa hopi trabou pasobra nan yiunan ta laga nan na caya,” e ta opina.

“Temponan ta cambia y tin hende cu no ta worry ni cu nan mama, cu ta e hende muhe principa den nos bida y nan ta hinca nan den cas di hende bieu, pasobra nan yiunan ta traha y no por wak ni pa nan mesun mama,” el a manifesta.

Tambe el a bisa cu hende muhe tin mas sentido di bida cu hende homber; hende muhe tin preocupacion manera cu nan curpa, cu cas, nan yiunan, compara cu hende homber. Hopi biaha ora un homber muri e muhe no ta pasa asina hopi trabou, pasobra e muhe sa di usa su cabes,” Titi a bisa.

Tocante casonan di abuso di hende muhe na Aruba, el a trece dilanti cu esey semper tabata existi: “semper mi a mira maltrato” aunke e nunca a pasa den esey. Titi a conta cu algun tempo pasa e tabatin bisiña cu semper tabatin miedo di nan casa, haci cuminda lihe pa nan bay sconde pasobra su casa tabata batie y trat’e malo. “Ami no ta compronde e cos ey, si nos a casa y ta supone cu nos ta sinti amor pa otro, pakico bo tin cu maltrata mi?”, el a señala.

Mi ta recomenda hende muhe, cu ora nan lo kier casa cu un homber, pa siña conoce otro bon y bis’e cu esey no por sucede: “bis’e cu mi no a casa cu bo pa bo dal mi of maltrata mi.”

Pa finalisa, Titi a expresa cu awendia e muhenan ta pensa miho, nan a bay dilanti durante decadanan cu a pasa, a lucha pa nan derecho, pa nan tin un bon funcion y e mesun salario cu hende homber: “nos tin un minister president hende muhe y ey por mira cu hende muhe a haya mas poder, pero tambe no tur hende muhe por asumi esey di bon manera.”