E siman aki centenares di turista a keda pega na Aruba debi na e ultimo cancelacion di vuelo bayendo y biniendo for di Merca. Aki ta trata vuelonan cu ta bin mayormente for di e parti noordoost di Merca, cual actualmente ta pasando den un tormenta di sneeuw y clima friu.
Aerolineanan JetBlue, United Airlines, Delta Airlines y American Airlines mester a cancela nan biahenan mientras algun ciudad Mericano manera Boston y Newark ta experenciando un cantidad di sneeuw. Segun medionan internacional ta reporta, e clima friu a afecta varios aeropuerto Mericano, incluyendo John F. Kennedy International Airport, Newark Liberty International Airport, Logan International Airport y Philadelphia International Airport.
Pero Aruba no ta e unico isla den region cu a ser afecta pa e cancelacionnan aki. Den Caribe, tin varios destinacion cu a mira un ola di cancelacion di vuelo recien causa pa e clima severo na Merca. Aeropuertonan na Puerto Rico, Republica Dominicana y Jamaica tambe a reporta retraso y cancelacion riba rutanan conecta na ciudadnan Mericano. Turistanan na Santo Domingo y Punta Cana a keda pega pasobra avionnan y tripulacion no por a sali for di aeropuertonan na Merca afecta pa e clima.
E situacion ta subraya con cerca biahe aereo den Caribe ta depende riba operacion na ciudadnan Mericano.
Tendencia di cancelacion durante ‘high season’
E incidente aki ta bin despues di varios cancelacion durante e ultimo luna, unda Aruba a mira centenares di turista sin manera pa sali for di e isla—varios di nan sin luga pa keda.
Aunke e problema no ta bin di Aruba su banda, e cancelacionnan aki ta señala con condicionnan di clima—hasta na otro banda di mundo—por trece su consecuencia na nos mercado di turismo. Aruba, como un isla mayormente dependiente riba turismo Mericano, tambe ta keda afecta pa retraso y cancelacion causa pa influencia exterior, unda e sector di turismo y hospitalidad lo mester acomoda y yuda turistanan cu ta keda pega pa un of varios dia. Na mesun momento, otro turistanan ta keda drenta e pais poniendo mas presion riba e sector aki.
Manera ta conoci Aruba ta den pleno high season y ta custumber cu esaki ta un di e lunanan cu mas turista ta bishita Aruba. Historicamente e ta un tendencia y Aeropuerto Internacional Reina Beatrix ta na altura di esaki y sa cu ta di spera un fluho significante di hende cu ta drenta y sali for di e isla. Y den un situacion unda varios vuelo ta cancela, e fluho ta bira aun mas pisa, posiblemente treciendo inconveniencia na ambos turista y servicionan riba e isla.
Y Aruba a mira caba e efecto cu sucesonan asina por tin. Na december aña pasa, varios vuelo entre Aruba y Merca a keda cancela pa motibo di condicionnan di clima, un tormenta poderoso di winter cu a afecta New York y New Jersey, y problemanan tecnico cu no tabata relaciona cu e tormenta. E impacto combina a crea un interupcion den trafico aereo di tanto entrada como salida, na Aeropuerto Internacional Reina Beatrix.
A consecuencia di e cancelacionnan, aproximadamente 300 pasahero no por a sali for di Aruba y tabata rekeri acomodacion pa anochi. Cu hotelnan operando e tempo ey casi na capacidad completo debi na e temporada halto, autoridadnan a enfrenta retonan inmediato pa sigura suficiente camber. E situacion a causa un apelacion urgente na e comunidad, pidiendo residentenan cu tabata doño di propiedadnan di huur di termino cortico (short term vacation rentals) pa asisti den alohamento di turistanan pega.
E yamado na comunidad pa asistencia a pone enfasis riba Aruba su tradicion di hospitalidad y solidaridad. A pidi ciudadanonan cu tin acomodacion disponibel, entre otro apartamento, condominium, y casnan priva, pa tuma contacto cu Aruba Tourism Authority (ATA) y duna nan datonan personal hunto cu e capacidad di nan propiedadnan.
Pa fin di dia, oficialnan a informa progreso den sigura acogida pa mayoria pasahero pega, danki en parti na e contesta rapido di hotel y doñonan di propiedad priva.
E siman aki a mira un otro cancelacion, e biaha aki di e crucero Island Princess. Manera Bon Dia Aruba a reporta diamars, e crucero mester a cancela su ruta pa e isla debi na bientonan fuerte den e region y condicionnan insigur den waf. E cancelacion aki tambe a afecta pasaheronan cu tabata anticipa di pasa un dia riba e isla. E barco tabata spera di yega waf cu otro barco crucero, pero condicionnan di clima a dicidi riba un otro destino.
Discovery I tabata e unico barco crucero cu por a mara na Aruba diadomingo. El a yega alrededor di 8:00 a.m. y tabata programa pa keda te 8:00 p.m., proveendo asina un otro fuente di turismo pa negoshinan local.
Den e caso aki a mira tambe con condicionnan di clima por trece efecto den nos mercado di turismo, unda barconan ta keda cu e unico opcion pa cambia ruta.
E temporada aki tambe ta conoci pa ta high season pa cruceronan.
E strobacionnan di e ultimo lunanan ta sirbi como un recordatorio con cerca Aruba su conectividad ta depende riba clima. Hasta cu un clima constante cu minimo yobida henter e aña, clima miles di kilometer leu por trece efecto toch na nos isla, impactando nos sector mas importante.
