Caribbean Weather Center den un publicacion a informa cu tormenta tropical Elsa a kibra record como e di cinco tormenta di e temporada cu a forma lihe for di un ola tropical activo cu bientonan sosteni di 40 nudo cu rafaganan te 50 nudo.
Esaki lo move entre e islanan ABC entre awe y mañan fortaleciendo su mes y tambe lo por bira un horcan, ta espera cu por causa yobidanan awe y mañan na medida cu e ta aleha for di e islanan.
Asina mes, Meteo Aruba ayera a informa cu den proximo 24 ora tin un ola tropical cu ta moviendo na parti oost di e Caribe y lo pasa local bayendo west.
Sinembargo, tambe a indica cu e humedad di e sistema por trece cune algun awasero cu lamper y strena.
Stof di Sahara ta persisti y lo por stroba visibilidad durante dianan aki.
Di loke ta trata condicionnan maritimo, Meteo ta informa cu estado di lama lo ta leve te modera y olanan lo por ta for di oost entre 4 pa 7 pia, nan ta sugeri pa ocupantenan di boto chikito pa bay cu cautela na partinan oost te noordwest y riba lama habri, tambe cerca of den awasero.
Di mesun manera, tambe a keda conoci cu avion Hurricane Hunters a aterisa na Aruba den oranan di merdia pa haci vuelo den e sistema entre awe diabierna y mañan diasabra operando for di Aruba pa despues bay back na Florida, Merca.
