Despues cu na september 2025, Minister di Finanzas, Asunto Economico y Sector Primario, Geoffrey Wever, a firma e Uitvoeringsovereenkomst cu e compania cu a gana e destaho pa renobacion y mantencion di e pier di ex-Brisas del Mar na Savaneta, dialuna e trabaonan a cuminsa oficialmente cu e acto di groundbreaking pa inicia e ehecucion di e proyecto.

E pier di ex-Brisas del Mar ta un infrastructura hopi importante pa comunidad di Savaneta y ta wordo uza intensamente pa diferente proposito, manera piscamento, landamento, pa bay y regresa for rif cu boto, y tambe pa actividadnan di diferente fundacionnan y gruponan comunitario. Pa motibo di e trabaonan di renobacion, e pier lo ta temporalmente ‘out of service’ pa algun siman. Minister Wever lo informa oportunamente ora cu e pier lo habri bek pa uso publico.

Mantencion y renobacion di piernan rond di Aruba ta forma parti di e prioridadnan di Gobierno pa fortifica y desaroya e sector di pesca, segun un comunicado di gobierno. Pa duna contenido concreto na e vision y maneho di gobierno pa e sector di pesca, manera palabra den e Programa di Gobernacion AVP-FUTURO 2025-2028, minister Wever a percura pa aloca un cantidad di Afl. 500.000 pa renobacion di piernan pa nos piscadornan. E pier di ex-Brisas del Mar na Savaneta ta e prome proyecto den e trayectoria aki, y pronto lo sigui cu e pier den Colony na Rodgers Beach.

Den cuadro di e renobacion, e pier lo haya palo y trapi completamente nobo, diseña pa mehora su durabilidad, seguridad y uso practico. E trabaonan ta ser ehecuta door di un contratista cu amplio experiencia, cu a realisa renobacion y mantencion di diferente piernan na Aruba pa basta aña.

Infrastructura basico y adecua ta esencial pa crecemento y desaroyo sostenibel di e sector di pesca. E compromiso di Gabinete AVP-FUTURO ta pa facilita nos piscadornan y e comunidad en general cu e infrastructura necesario pa por continua usa e piernan aki, sea pa eherce nan ofishi of pa disfruta di nan tempo liber na lama.

“Mi ta contento di mira cu awe e vision cu nos tin pa e sector di pesca ta bira realidad. Nos ta cuminsa cu un pier, y pronto nos lo sigui cu renobacion di e siguiente, te ora cu nos logra renoba tur. Pronto e pier di ex-Brisas del Mar lo ta completamente renoba y cla pa uso di nos piscadornan y di tur habitante di Savaneta,” minister Wever a expresa.