Gobierno di Aruba, bao liderazgo di Prome Minister Mike Eman, ta realisando trabaonan di mantencion na Monumento 18 di Maart, un lugar historico cu ta simbolisa e peticion di 2.147 Arubiano cu na 1947 a firma pa expresa nan deseo pa autodeterminacion di Aruba.

E proyecto a tuma lugar den colaboracion cu Design Academy of Aruba, lidera pa Loucette Reppenhagen, caminda studiantenan ta participa activamente den limpiesa y restauracion di e monumento, incluyendo e limpiesa y verf di cada letra y number di e grabacion historico.

Segun Prome Minister Mike Eman, e monumento ta representa e esfuerso y compromiso di e hendenan cu a duna forsa na e movemento pa autonomia di Aruba. El a enfatisa cu e historia di e peticion, presenta pa prome biaha na Conferencia di Mesa Rondo na Den Haag dia 18 di maart 1948, tabata un paso historico caminda e derecho di Aruba pa busca su propio status constitucional a wordo reconoce en principio.

E monumento no solamente ta honra e lidernan di e lucha, pero tambe e 2.147 ciudadano cu a firma e peticion. Cada un di e nombernan graba riba e monumento ta representa un historia di participacion, compromiso y amor pa Aruba.

Un detaye special durante e restauracion ta e candela simbolico di e monumento, cu anteriormente tabata paga pero awor ta cendi atrobe pa representa luz, speransa y continuidad di e lucha pa autonomia di Aruba.

Segun Edwin Croes, miembro di fundacion encarga cu e monumento, e participacion di comunidad y preservacion di historia ta fundamental. El a enfatisa cu e proyecto di mantencion ta un manera importante pa preserva memoria historico, honra e firmantenan original y inspira generacionnan futuro pa recorda e lucha cu a conduci na autonomia di Aruba.

Plaza 18 di Maart – Historia den corto

Plaza 18 di Maart, situa den centro di Oranjestad, ta dedica na Dia di Himno y Bandera di Aruba, celebra cada aña dia 18 di maart.

E fecha aki recorda diferente momento historico importante pa Aruba:

1948 – Durante e Conferencia di Mesa Rondo na Den Haag, e derecho di Aruba pa busca un status aparte dentro di Reino Hulandes.

1976 – Aruba a adopta oficialmente su himno nacional “Aruba Dushi Tera” y su bandera nacional.

Plaza 18 di Maart ta keda un lugar simbolico den Oranjestad, caminda cada aña e pueblo di Aruba ta celebra su orguyo nacional, identidad y historia.