Autoridadnan ta investigando un tiroteo fatal di polis cu a sucede diamars atardi den e area di Pos Abou, despues di un incidente cu a envolvi agentenan policial, y un homber di 36 aña cu despues a fayece di heridanan di bala. Segun informacion oficial di Korps Politie Aruba (KPA) e caso actualmente ta bou investigacion di Landsrecherche debi na envolvimento di un agente policial.

Di acuerdo cu un declaracion oficial di polis, e incidente a desaroya mas o menos 3:10 p.m. diamars ora cu Central di Polis a ricibi un peticion pa asistencia di FACT Team di Respaldo. E peticion tabata concerni un pashent na Pos Abou cu segun informe supuestamente no tabata coopera y tabata comporta su mes agresivo, loke a pone cu e team a pidi sosten di polis y ambulance na e sitio.

Version di polis di e incidente

Unidadnan di polis cu a responde na e yamada a informa di a topa cu e pashent y cu e tabatin un machete den su man y tabata comporta di manera agresivo na momento cu nan yegada. Oficialnan na e sitio a declara cu nan a haci multiple intento pa de-escala e situacion y a emiti orden verbal ripiti instruyendo e individuo pa pone e arma abou.

Segun e comunicado di polis, e pashent no a cumpli cu e ordennan aki y, na cierto momento, a move den direccion di un agente policial mientras cu ainda e tabatin e machete den su man. Polis a declara cu, mirando e seriedad y e menasa percibi pa e seguridad di e oficial, e oficial envolvi a saca su arma di servicio y a los tiro, dal e individuo.

Mesora a pidi servicionan medico di emergencia cu maximo urgencia. Personal di ambulance a presenta na e sitio, a duna asistencia medico, y a stabilisa e homber herida prome cu transport’e pa hospital bou di condicionnan di emergencia. A pesar di intervencion medico, autoridadnan despues a confirma cu e individuo a sucumbi pa su heridanan.

E defunto a ser identifica como F.M.H., un homber naci na Aruba dia 30 di augustus 1989, di 36 aña di edad.

Siguiendo e procedura standard den casonan cu ta encera uso di forsa letal door di un oficial policial, varios autoridad a ser desplega na e sitio, incluyendo polis forensico, Departamento di Slachofferhulp, y Landsrecherche. Formalmente a traspasa e investigacion pa Landsrecherche pa garantisa independencia y transparencia.

Version di famia y acusacionnan

Sernan keri di e defunto, identifica pa miembronan di famia como Frank Henriquez, a comparti publicamente un relato notablemente diferente di e sucesonan cu a conduci na e tiroteo. Den declaracionnan emocional publica riba rednan social, un familiar a describi Henriquez como un individuo trankil y alegre cu a mantene un relacion estrecho cu su mama y frecuentemente tabata comparti musica y videonan live online.

Di acuerdo cu e familiar e sucesonan a cuminsa mas trempan e mesun dia ey, dia 27 di januari 2026, ora cu Respaldo a tuma contacto cu e mama di Henriquez y a pidie pa busca su yiu homber. Segun e informacion comparti den e publicacion, Henriquez a ser aproba pa bandona e facilidad y asina regresa cas cu su mama, kende despues a puntra tocante di obtene e documentacion necesario pa formalisa su salida, pero a ser bisa cu ta okay pa e sali.

E famia ta indica cu Henriquez a regresa cas den bon animo, a pasa tempo ta sosega den cura, y despues a bisa cu e tin hamber. Su mama a bis’e cu e traha algo di come p’e, pero Henriquez a bisa su mama cu e mes por traha algo di come. Mas o menos dos ora despues, supuestamente personal di Respaldo a informa e famia cu nan a comete un eror y cu Henriquez no tabata permiti pa sali, como cu e papelnan pa e por sali no a ser firma.

Segun familiarnan, personal di Respaldo despues a bay cas di Henriquez na Pos Abou compaña pa polisnan pa bay cune Respaldo back. E miembro di famia ta declara cu Henriquez tabatin miedo di polis pa hopi tempo, un hecho cu e ta bisa tabata conoci pa tanto e famia como e team di Respaldo. Mas aleu nan ta alega cu den situacionnan anterior, Henriquez a ser transporta cu ambulance y remedi pa yuda calm’e, loke nan ta bisa no a sucede na e ocasion aki.

Den su publicacion e familiar ta indica cu oficialnan policial a drenta e cas y a insisti pa Henriquez sali mesora. Familiarnan presente na e sitio, incluyendo su mama y su sobrina, a pidi oficialnan pa duna tempo pa e situacion de-escala y a ofrece pa hib’e back nan mes. Di acuerdo cu e declaracion den e publicacion, Henriquez a spanta, a coy un cuchiu, y a para tene esaki sin avansa den direccion di oficialnan.

E familiar ta remarca cu a pesar di suplicanan ripiti di su mama y sobrina pa oficialnan baha nan armanan y duna tempo pa calma Henriquez, polis a los multiple tiro y tres bala a alcansa Henriquez den pecho. Segun informacion Henriquez su mama tabata para banda di dje y a presencia e tiroteo.

E famia a critica fuertemente e accionnan di polis, acusando oficialnan di uso excesivo di forsa y pidiendo pa responsabilidad. Tambe a cuestiona pakico personal di Respaldo cu tabata presente na e sitio no a interveni mas activamente pa comunica cu Henriquez.

Declaracion di Comisario di Polis

Como contesta riba e incidente y e reaccion publico cu esaki a genera, Comisario di Polis Ramon Arnhem a emiti un declaracion publico expresando condolencia y a urgi pa trankilidad mientras cu e investigacion ta sigui.

“Ayera a tuma lugar un incidente lamentabel. Mi coleganan tabata involucra den un incidente di tiramento na unda un persona lamentablemente a fayece na Pos Abou. Un situacion dificil cu ambos partido a wordo afecta negativamente. Pa un mayor y famia perde un yiu den un forma repentino ta inexplicabel y ta haci hopi dolor,” el a remarca.

El a enfatisa cu na niun momento su coleganan ta sali for di cas y bay labora pa haya nan mes den un situacion asina aki y a sigura cu e ta biba e dolor cu tin comunidad, mescos cu su coleganan cu ainda ta den shock pa cu e incidente en cuestion.

Arnhem a confirma cu e investigacion a ser poni den man di Landsrecherche, bou direccion di Ministerio Publico, netamente pasobra un agente policial tabata envolvi. “Mi sa tambe cu tin hopi pregunta, hopi dolor y hopi persona kier sa kico a pasa. Pa nos tur haya e claridad e investigacion ta den man di Landsrecherche bou liderazgo di Ministerio Publico. Nan lo percura pa investiga e caso aki paso na final di dia tur partido envolvi por haya claridad mescos cu a nos.” el a bisa.

Mas aleu el a splica cu, debi na e investigacion andando, tur pregunta tocante e caso mester ta dirigi na Ministerio Publico. Arnhem tambe a extende palabranan di condolencia na e famia di e defunto y a reconoce e peso emocional riba e oficialnan envolvi, declarando cu sosten psicologico lo ser poni na nan disponibilidad.

Por ultimo, Comisario Arnhem a manda un mensahe pa comunidad pa trankilidad na e momentonan aki. “Un mensahe mi tin na nos comunidad pa ban mantene e trankilidad y e investigacion ya caba ta canando su caminda,” el a conclui.

E tiroteo fatal a lanta discusion publico amplio y reaccionnan emocional rond di e isla, particularmente riba rednan social, unda e yamadanan pa transparencia y husticia a intensifica. Miembronan di comunidad a expresa tristesa, rabia y preocupacion tocante interaccionnan di polis cu individuonan cu ta experiencia crisis di salud mental.

Den e fase aki, oficialnan ta enfatisa cu e investigacion ta andando y cu no mester saca conclusion te ora cu tur evidencia, declaracion di testigo, resultadonan forensico y revisionnan di procedemento keda completa. Ministerio Publico lo determina si mas pasonan huridico ta necesario unabes cu e investigacion ta conclui.

Mientras cu famia di e defunto y comunidad ta sigui procesa e tragedia, atencion ta keda enfoca riba e resultadonan di e investigacion independiente, cu ta spera di duna claridad riba un caso cu a laga un famia den luto, agentenan policial den shock, y un comunidad buscando contesta.