Aña nobo ta ser ricibi tradicionalmente cu speransa, bon intencion, y e anticipacion di un comienso nobo. Sinembargo e transicion pa 2026 tabata diferente pa Aruba. E prome dianan di aña tabata marca pa un serie di sucesonan tragico cu a hinca e isla den luto y a laga un sintimento pisa. En bes di celebracion y optimismo, e tono a ser fiha pa tristesa, perdida, y un reflexion colectivo riba seguridad, responsabilidad y e fragilidad di bida.
Un di e incidentenan mas impactante di e prome siman di januari a sucede na hotel St. Regis, unda dos turista a perde nan bida. Diadomingo 4 di januari pa 8:44 di mainta Central di Polis ta ser notifica cu na St.Regis Hotel un persona lo a cay di balcon y no ta duna señal di bida. Inmediatamente a manda polis y como tambe ambulance na e sitio. Na yegada di e unidad di polis en berdad nan ta topa un hende homber cu no ta duna señal di bida.
Investigacion haci a indica cu e victima, B. Jozic naci 13-11-1980 na Bosnia di nacionalidad Mericano, a bula for di e piso mas halto di e hotel.
Despues polis y personal di hotel a bay controla e camber di e victima y a bin encontra un dama cu tampoco tabata duna señal di bida. Ta trata aki di e casa di e victima, C. Jozic naci 13-11-1973 na Filipinas di nacionalidad Mericano.
E morto tragico di bishitantenan cu a bin Aruba pa disfruta y relaha a afecta e comunidad local profundamente y a laga un impresion fuerte riba personal di hotel, servicionan di emergencia, y residentenan.
Na mesun momento, e isla a hay’e confronta cu varios accidente di trafico serio durante e mesun periodo. Den e prome siman di 2026, un accidente fatal a tuma lugar den cual un pareha a perde nan bida. Tabata trata un hit and run cu a sucede diadomingo 4 di januari pa 11:58 di anochi riba L.G. Smith Blvd.
Un auto modelo SUV color preto a alcansa dos peaton y a sigui core bay. Central di Polis a despacha patruya y ambulance na e sitio di e sucedido cu maximo urgencia. Na momento cu personal di ambulance a yega na e sitio lamentablemente no por a haci nada mas pa e victimanan.
Polis a cuminsa cu un buskeda pa e auto cu a dal e dos persona, y na un adres na Bushiri a topa cu e auto y a detene e chauffeur femenino.
Na e sitio, dokter forensico a constata morto di e pareha: Josely Paulina Vasquez Gonzalez naci riba 09-07-1960 na Republica Dominicana y Carlos David Vialez Valerio naci riba 19-10-1971 na Republica Dominicana, prome y di dos morto den trafico pa aña 2026.
E hecho cu e chauffeur a bandona e sitio despues di e accident a causa indignacion y tristesa adicional.
Ademas di e accident fatal aki, un motociclista tambe a resulta gravemente herida den un accidente di trafico den e prome dianan di aña. Ayera mainta tambe otro accidente di trafico a tuma luga na unda un auto a bolter riba Green Corridor y e chauffeur a resulta herida.
E acumulacion di e tragedianan aki a haci a transforma e prome siman di aña den un siman di luto y reflexion. Riba rednan social hopi hende a expresa nan condolencia na esnan cu a perde nan sernan keri, pero na mesun momento, frustracion y preocupacion tambe a keda expresa tocante patronchinan cu ta ripiti, particularmente den seguridad riba caminda.
Pa añas, autoridad y organisacionnan a bin ta adverti tocante e riesgonan riba caminda. A pesar di campañanan, aplicacion mas estricto, y yamadonan pa accion, e cantidad di accidente di trafico serio ta keda alarmante. E dianan di fiesta y fin di aña ta conoci pa aumento di aglomeracion di trafico y e aumento di riesgo di uso di alcohol. E sucesonan di e prome siman di 2026 ta confirma cu e combinacion aki ta keda uno sumamente peligroso.
Politica di seguridad riba caminda na Aruba ta enfoca riba ehecucion, prevencion, y conscientisacion, pero incidentenan recien ta demostra cu regulacionnan so no ta suficiente. Seguridad riba caminda ta rekeri un cambio den mentalidad, cu cada chauffeur riba caminda consciente di su responsabilidad. Limite di velocidad, control di alcohol y medidanan tecnico ta importante, pero sin respet, pasenshi y cuido pa otronan, e riesgonan ta persisti.
E gravedad cu cual 2026 a cuminsa ta pidi pa reflexion. Autoridad, lidernan social y ciudadanonan ta enfatisa cu e tragedianan aki no mester bira simpel estadistica. Nan mester sirbi como un yamado pa tuma un momento pa refleha riba con cosnan por y mester ser haci di un manera diferente. Aumento di atencion pa seguridad, aplicacion mas estricto di reglanan, y, riba tur cos, un sentido di responsabilidad mas grandi pa cu otro ta esencial pa preveni un recurencia.
Aunke comienso di aña a ser marca pa dolor, tambe tin speransa cu e comienso dificil aki por conduci na cambio. Solamente door di scoge colectivamente cuido, respet, y responsabilidad Aruba por purba transforma e dificultad di e prome dianan aki den un futuro den cual seguridad y humanidad ta primordial.
