Dialuna mainta, trahadonan di Arubus NV a tene un accion di protesta y a pone trabao plat for di 4:30 di marduga te 8:30 di mainta. Esaki ta e di dos accion di protesta cu e trahadonan ta realisa den dos siman. Cu e accionnan aki e trahadonan kier enfatisa nan malcontento pa e situacionnan cu nan ta enfrentando cu no ta ser soluciona, entre otro e falta di un structura salarial.

Segun e secretario general di SEPPA, Magaly Brito a indica na un noticiero local e motibo di e accion ta cu ainda nan no por keda cla cu e structura salarial, algo cu nan tin basta tempo caba wardando riba dje.

Britto a splica cu e aña pasa e negociacionnan a dal un stap den un direccion positivo despues cu e minister di Transporte e tempo ey a informa e sindicato cu el a bay di acuerdo cu e proposicionnan cu tabatin riba mesa y cu e lo bay Parlamento pa pone e placa disponibel pa por paga e trahadornan un suma como compensacion pa motibo cu ta alarga e CAO pa 2025.

Pero te ainda e trahadonan ta wardando, y Brito a indica cu gobierno a bisa no tin e placa pa concretisa esaki. Na mesun momento el a cuestiona con esaki ta posibel si algun siman atras minister di Finanzas y otro ministernan a informa na pueblo cu e situacion financiero di Aruba ta stabiel y cu tin surplus, cual segun e mandatario a informa ta danki na e sacrificio di pueblo.

Brito a enfatisa cu e trahadonan di Arubus tambe ta sacrifica y hasta tin palabracionnan haci cu nan cu nan lo ricibi e placa, pero nada no a ser concretisa locual ta trece un malcontento mas grandi entre e empleadonan.

E accion di protesta di dialuna tabata e di dos protesta realisa den dos siman. Dialuna 18 di augustus tambe e trahadonan di Arubus NV a pone trabao plat entre 8:30 y 10:30 di mainta pa demostra nan frustracion, malcontento y pa alabes pone presion pa nan por yega na un solucion pa e situacion cu nan ta aden.

Den luna di juli minister di Transporte Publico, Arthur Dowers (AVP), a tene un reunion cu representante di SEPPA, Magaly Brito y Edmundo Marlin, hunto cu shopstewards di ARUBUS.

Durante e reunion, a trata varios tema relaciona cu bienestar laboral di empleadonan y un di e temanan principal tabata e contrato colectivo (CAO) cu a vence pa empleadonan di ARUBUS, cu ainda no a keda cla. Segun minister Dowers ta ex minister di Transporte, Ursell Arends (Raiz) ken a haci e compromiso pa un suma di 500 mil florin adicional pa Arubus, cual e minister nunca a cumpli cune.

Minister Dowers a expresa su comprension pa e preocupacionnan presenta y a sigura SEPPA cu lo haci su maximo esfuerso pa yuda yega na solucionnan practico y duradero.

For di basta tempo caba trahadonan di Arubus ta mustrando nan mal contento cu varios accion exigiendo un structura salarial nobo y un trato igual. Aña pasa e trahadonan di Arubus a realisa accion di protesta na varios ocasion. Aña pasa den luna di juli Roque Tromp, ken ta fungi como shop steward di SEPPA, a declara na diferente medio cu for di 2017 nan ta bringando pa un structura salarial nobo pero no por a yega na un acuerdo. El a indica cu gerencia kier impone un structura salarial nobo cual no ta aceptabel pa trahadonan ainda y p’esey nan ta protesta y demostra nan malcontento pa esaki.

Roque a splica cu e mal situacion financiero di Arubus ta un historia cu semper ta bin dilanti for di basta tempo, y ta algo cu mester ser drecha pasobra e situacion por ta malo, pero no ta pa via di e trahadonan.

“E trahado si ta esun cu ta afecta y sufri pa motibo di e situacion malo cu otronan ta ocasionando, por ehemplo loke gerencia ta creando cu mal maneho y decisionnan descabeya, anos ta pagando e prijs. P’esey nos no por keda carga cu e lucha aki mas,” el a enfatisa den su declaracion e momento ey.

Pa eherce un poco mas presion y den buskeda di un solucion, trahadonan di Arubus hunto cu Brito a reuni dilanti Bestuurskantoor pa asina entrega un carta na minister encarga cu Transporte e tempo ey, Ursell Arends, ken a señala cu Arubus mester di un reorganisacion.

Brito a indica na e minister di Transporte e tempo ey cu trahadonan di Arubus tin un trayectorio largo pa logra haya un acuerdo y salario husto pa nan tambe por sobrevivi den temponan aki cu costo di bida ta pisa hopi den nan cartera. Brito, den nomber di e trahadonan a entrega un peticion na e minister cu ta representa e compania estatal aki, pa asina pone mas fondo necesario y pa nan por yega na un acuerdo. El a pidi e tempo ey talbes un acuerdo cu lo por a calma e situacion pa permiti e trahadonan sigui brinda e servicio di calidad y eficiente.

E minister e tempo ey a bisa cu e ta lamenta cu e trahadonan mester a yega dilanti bestuurskantoor pa manifesta nan disgusto y a indica cu como gobernante y di parti di Gobierno e tempo ey, e tambe ta disgusta, pasobra ta politica y gobernantenan a conduci pa Arubus ta un compania cu practicamente ta den bancarota.

Ademas, el a informa cu ta evidente cu “gerencia ta incapaz”, pa motibo cu a faya su trahadonan y Gobierno di Aruba.

Algun dia despues e mandatario e tempo ey a anuncia e retiro di Edwin Mohamed como director di Arubus.

Arends a splica cu e situacion financiero di Arubus ta critico cual a ser confirma pa varios instancia profesional y imparcial, Algemene Rekenkamer, CAft y Price Waterhouse Cooper.

El a indica cu tin un diferencia di opinion y un diferencia fundamental di vision entre e accionista y hunta di directiva, compara cu e director saliente. El a señala cu e punto di salida di Gobierno ta cu Arubus no por sigui depende solamente riba fondonan publico y cu e instancia mester expande su servicionan comercial tambe, na mes manera cu tur otro NV.

El a subraya cu no por hustifica tanto beneficio cu a ser otorga na trahadornan, sin cu e parti comercial ta produci minimo un resultado aceptabel.

Mas cu un aña despues keto bay e trahadonan di Arubus ta den lucha pa yega na un solucion. Bon Dia Aruba a purba tuma contacto cu minister actual di Transporte Publico, Arthur Dowers, pa puntra si e ta na altura di e accionnan di protesta di e trahadonan di Arubus, kico ta su comentario of reaccion riba esaki y si tin negociacionnan andando pa purba yega na un solucion pronto pa e situacion aki. Te na momento di ciere di nos edicion no a logra haya contesta di minister Dowers.