(AP) — Trahadonan na hospitalnan publico na Grecia a para trabao durante cinco ora ayera pa protesta un decision di gobierno cu ta haci vacunacion contra Covid-19 obligatorio pa tur trahado di salud den sector publico y priva.
Alrededor di 300 trahado di hospital a rally pafo di ministerio di Salud na Athens pa protesta e medida, cu ta drenta na vigor dia 1 di september. Gobierno a laga cla cu no ta bay otorga un extension.
Esnan trahando den sector di cuido di salud publico y priva, y esnan trahando na cas di cuido cu no a ricibi al menos un dosis di e vacuna pa e fecha ey, of cu no tin un certificado di recuperacion recien, ta bay ta suspendi di trabao.
“Nos no ta bay laga indefenso e trahadonan di salud y cuido social cu tin un derecho personal pa vacunacion”, e sindicato a bisa. “Pashentnan no ta den riesgo di contagia cu e virus for di trahadonan di salud. Hospitalnan ta yenando atrobe cu pashentnan sufriendo di coronavirus cu nan a contagia den comunidad.”
Minister di Salud, Vassilis Kikilias a bisa cu esnan cu tabata protestando contra e medidanan tabata un ‘minoria chikito’ cu frecuentemente ta protesta contra un variedad di asunto relaciona cu sistema di cuido di salud nacional. “Nan ta den direccion opuesto di mayoria di sociedad Griego, cu kier protege salubridad publico”, el a bisa.
Papiando riba Skai TV, Kikilias a anuncia e inicio di un programa piloto pa tin unidadnan di vacunacion mobil administrando vacuna den plazanan y pafo di iglesianan. E programa lo cuminsa diadomingo awo riba e isla di Crete, e minister a bisa, y lo extende na e ciudadnan principal di e pais.
Grecia ta buscando pa reforsa su campaña di vacunacion cu un serie di incentivo. Ta mirando un aumento stabiel den cantidad di caso confirma di Covid-19 y morto, como tambe hospitalisacion y intubacion, durante ultimo simannan. Camanan di ICU pa pashent di Covid-19 ta mas cu 69 porciento yen, mientras pisonan regular di Covid-19 ta 45 porciento yen, cifranan di ministerio di salud ta mustra.
Riba diamars, Kikilias a bisa cu ‘significantemente mas cu 90 porciento di pashent cu ta den ICU pa Covid no ta vacuna’, sin specifica si algun di nan a ricibi un dosis y no tabata completamente vacuna ainda.
A administra mas cu 11 miyon dosis di vacuna, cu 5.6 miyon persona awo completamente vacuna den un pais di alrededor di 11 miyon persona.
Vacuna di Covid-19 ta disponibel gratis na Grecia pa cualkier persona mayor di 12 aña di edad. Vacunacion no ta obligatorio cu excepcion di esnan den cuido di salud, pero riba diamars gobierno a anuncia rekisitonan nobo di test, y restriccionnan pa haya acceso na varios sitio pa personanan cu no ta vacuna.
E medidanan, cu ta bay ta na vigor for di dia 13 di september te cu dia 31 di maart, ta inclui test tur siman of cada dos siman pa trahadonan sin vacuna den sector publico y priva, y acceso na sitionan paden manera restaurant, bar y cafe, y entretenimento, permiti solamente pa esnan cu certificado di vacunacion of recuperacion recien.
