Tin un situacion di malcontento andando cerca e trahadonan di e compania Burger King na Aruba. Algun di e trahadonan a yega di bati e porta di sindicato FTA, debi cu ta existi un ambiente di incertidumbre laboral cerca nan.
Presidente di sindicato FTA, Hubert Dirksz, a declara na Bon Dia Aruba cu algun trahado den nomber di tur e trahadonan di e compania menciona a expresa nan intencion di bira miembro di e sindicato. E trahadonan di Burger King tabatin sindicato hopi aña pasa; pero despues nan a sali for di dje.
E veterano sindicalista a bisa cu generalmente e trahadonan ta dicidi di bira miembro di un sindicato na momento cu sea nan ta sinti un insiguridad laboral. Pero tambe ora cu nan poder di compra, salario y condicion di trabou ta inhusto of hopi abou. Otro causa tin di haci cu mal ambiente laboral, ya sea mal trato verbal y personal hopi malo.
Den e caso aki -a base di loke nan a wordo informa- FTA ta kere cu e trahadonan di e compania menciona no solamente a bin pa purba di haya miho condicion di trabou y miho salario, pero mas tanto pa e siguridad di e trabou. “Esey ta loke ta pasando,” el a bisa.
Te ainda FTA no a formalisa e tramite pa cuminsa cu e proceso di referendum of aceptacion di parti di e compania di nan representacion sindical di e trahadonan. Di e forma aki nan ta haci uzo di nan derecho y libertad cu tur trahado tin na Aruba pa solicita representacion sindical, segun nos constitucion y ley laboral.
“Si! Nos ta papiando cu e trahadonan y ban spera cu esaki cristalisa cu nos tin un grupo di trahado, mas miembro di FTA, cu nos por atende cu nan asuntonan,” segun sindicalista Hubert Dirksz. FTA ta dispuesto pa yuda e trahadonan di e compania Burger King pa atende cualkier problema cu nan tin pa busca nan respectivo solucion.
Informacion cu a yega FTA ta indica cu e compania aki a conoce un doño nobo, y e sindicato aki ta haya cu esaki ta e reto cu nan tin como sindicato pa deal cune. E ta kere cu hopi biaha e trahadonan, pa motibo di incertidumbre, insiguridad y cualkier informacion of trato no normal of no custumbra, ta dicidi di bay cerca e sindicato.
Otro situacion tin di haci ora cu e trahadonan tin cierto beneficio y prestacion laboral cu e doño nobo, cu ta tuma over e operacion di e negoshi, no kier respeta ni reconoce. Presidente di FTA a declara cu nos tin ley vigente pa atende e asunto aki. Por ehempel e ley di traspaso di negoshi t’ey, pero solamente cu e mester wordo respeta.
“Ora cu negoshi ta pasa pa un doño nobo, e trahadonan ta pasa over, y e ta mantene tur su beneficionan cu e tabata ricibi door di e dunado di trabou bieu,” el a bisa.
Sinembargo FTA ta mira cu hopi biaha bo ta sinti cu e companianan of doñonan nobo di companianan no kier respeta esey. Y nan ta purba di tur manera di desvia di e ley aki, cu nos tin na Aruba.
