Minister di Husticia, mr. Drs. Arthur Dowers a indica cu e tendencia den criminalidad ta cambiando y husticia ta trahando duro pa combati e gruponan nobo haciendo nan mes culpabel na actonan castigabel. Tin varios team di Polis dedica na e trabao aki,trahando incansablemente cu coleganan di tur division pa logra resolve casonan cu presenta. Tin hopi Polis riba caya y Cuerpo Policial en general ta keda vigila desaroyonan di cerca, e mandatario a agrega.
Minister Dowers a bisa cu mientras cu un grupo grandi di hobennan cu usualmente ta esunnan culpabel di cierto crimen ta cera den KIA actualmente, por identifica dos grupo diferente cu a bira mas activo, esta un grupo di hoben local y un grupo di personanan cu ta drenta Aruba for di exterior na un forma legal y aki ta haci nan mes culpabel na actonan ilicito. E grupo di stranheronan tin atencion necesario di autoridadnan, nan ta actua diferente cu e gruponan local y por a constata cu nan tin menos escrupulo den forma cu nan ta comete nan actonan, e Minister a bisa.
E cadena di Husticia tabata reuniendo diamars y diaranson tocante e tendencia nan nobo y ta adaptando nan strategia pa loke ta e tipo di delitonan cometi of tabatin intencion pa comete den fin di siman pasa. Contrario cu loke hopi hende ta pensando, e turistanan aki cu ta cometiendo delitonan na Aruba no a drenta Aruba na un forma ilegal y ora check ta haya nan bek den e sistema di Radex di inmigracion. Nan ta drenta via di aeropuerto, pero lo tuma mas paso ainda pa frena nan entrada y asina limita nan actividadnan criminal.
Minister di Husticia a indica cu ta keda un reto grandi pa maneha e situacion actual, si tene cuenta cu un pais asina grandi, cu ta keda asina cerca, tin retonan enorme cu siguridad. Nan siguridad ta cayendo den otro, cu consecuencia no faborabel pa Aruba, cu ta un pais hopi chikito pero toch hopi cerca.
Minister Dowers a subraya cu mester aumenta inversionnan den husticia y bringa e “monster” cu ta asina cerca; Mester tin mas inversion, mas persona y mas colaboracion entre entidadnan pa preveni cu e problemanan di e pais bisiña ta afecta nos isla mas ainda.
Fuente: comunicado ministerio di husticia
