Parlamentario Jennifer Arends-Reyes (AVP) a expresa su palabra di  convivencia y condolencia  cu e dolor cu nos comunidad ta pasando aden cu e asesinato di e dos muchanan ruman cu a perde nan bida tragicamente.

E caso aki a hayando bastante atencion. E ta sigur cu e lo ta un  les pa tur persona cu ta wak  casonan di maltrato y abuso cu tin di haber cu muchanan, y tambe contra cualkier persona di nos comunidad.

“Esaki ta algo cu na Aruba nos no por sigui tolera.”

Tratado di Estambul
Den perspectiva di cambio riba tereno di lucha contra violencia, parlamentario Arends-Reyes a referi na e tratado di Estambul. E tratado aki tin di haber cu un accion internacional contra tortura, castigonan, tratamento cruel, inhumano y degradante.

El a bisa cu na Hulanda a wordo ratifica e tratado di Estambul na aña 2012 y na aña 2015 el a wordo aproba y un aña despues a wordo implementa. E ta un tratado cu tin su trayectorio y su tempo, pero te ainda na Aruba ta canando atras prome cu e ta wordo implementa. E ta un tratado cu ta exigi hopi prome cu ta wordo implementa.

E parlamentario aki ta considera e tratado di Estambul sumamente importante pa paisnan di reino traha riba dje. E ta rekeri diferente inversion pa ehempel pa bin cu un centro di crisis cu ta disponibel 24×7. Esaki ta demanda cu bo mester tin personal disponibel tur ora, sin excepcion,  durante 365 pa aña. Tambe mester tin asistencia huridico y financiero na momento cu nan ta haya casonan cu ta exigi esaki.

Tambe mester existi un compromiso politico na Aruba pa realisa esaki. Considerando cu e tratado aki ta mara na condicionnan, supervision y control di parti di Union Europeo.

Manifiesto
E ta wak diferente accion cu ta tumando di parti di fundacionnan entre nan esun di fundacion Hende Muhe den Dificultad cu a bin cu un caminata contra violencia di hende muhe.  Esaki ta un parti cu e ta considera relevante di trece e conscientisacion riba topiconan cu no por keda scondi. “Topiconan cu no por keda taboe”, e parlamentario ta bisa.

E ta kere cu nos tur mester ta uni pa confronta e lucha aki contra cualkier forma di violencia na Aruba. Sinembargo el a observa via social media cu durante un caminata solemne cu a tuma luga dia 25 di november ultimo a wordo entrega un manifiesto na parlamento. Pero te ainda e fraccion di AVP no a ricibi un copia di e manifiesto aki. “Pa nos tambe por tuma parti pa wak cual ta e puntonan cu a ser treci dilanti oficialmente na parlamento.”

Parlamentario Arends-Reyes a bisa cu den pasado nan tabata tuma e manifiestonan aki sigur na serio. Despues sea den comision of reunion nan tabata invita e fundacionnan tambe bin duna nan presentacion na parlamento. E ta haya cu esaki tabata un forma pa nan por tin un rol activo den esaki. Pero despues di entrega di manifiesto nada a sosode den parlamento.

Tambe el a referi na e periodo di conscientisacion nacional cu a cuminsa dia 25 di november ultimo y cu ta culmina dia 10 di december cu ta Dia Internacional di Derecho Humano. Un actividad tabata e prome simposio cu a tuma luga riba e topico aki na Aruba y na nivel di Reino Hulandes.

El a laga sa cu e tipo di tema aki a forma parti di e agenda cu e ultimo parlamento number 9 y seguramente e lo forma parti di e parlamento nobo number 10.  Nan a yega di haci diferente apelacion y discusion na nivel inter-parlamentario den reino Hulandes, pero tambe na nivel inter-parlamentario di Latino America y Caribe. “Mi ta kere akinan conhunto nos lo por conoce mas avance den e topico aki.”