Ayera Corte Superior a cuminsa oficialmente cu tratamento di apelacion den Caso Flamingo, un di e procesonan hudicial mas grandi y sensitivo den historia reciente di Aruba. E tratamento di apelacion ta programa pa continua durante henter siman, te diabierna 5 di juni.
E apelacion ta enfoca riba diferente acusacion serio, incluyendo abuso di funcion, fraude, falsificacion di documento y alegacion di trato preferencial den administracion publico durante e periodo cu ex-minister Otmar Oduber tabata ocupa cargo gubernamental.
Ministerio Publico ta sostene cu tabatin iregularidadnan den asignacion di tereno gubernamental y den maneho di diferente proceso administrativo. Defensa, di otro banda, ta rechasa e acusacionnan y ta argumenta cu e decision di Corte di Prome Instancia no a tene na cuenta tur elemento relevante di e caso.
Durante un audiencia preliminar anterior, Corte Superior a indica cu lo reevalua e caso completamente y a permiti dos testigo nobo ser scucha durante e proceso di apelacion. Segun defensa, e testigonan aki por aporta informacion importante tocante diferente aspecto central den e dossier, incluyendo e alegacionnan relaciona cu e “spookambtenaren”.
Investigacion criminal den caso Flamingo a cuminsa na 2020 y desde e momento ey a ocupa un lugar prominente den e panorama politico y hudicial di Aruba. Na januari 2025, Corte di Prome Instancia a declara Oduber culpabel di fraude, intento di fraude y abuso di funcion, decision cu a ser apela tanto pa di Ministerio Publico como defensa di Oduber.
