Ayera tardi mester a tuma luga e tratamento di e caso di apelacion cu parlamentario di fraccion AVP y candidato pa minister Mike de Meza a entama contra Ministerio Publico. Dialuna anochi informacion a sali na cla den cual ta indica cu e caso a ser posponi pa motibo di problema tecnico den corte.
Segun informacion publica den un medio di comunicacion local, abogado di de Meza, Sra. Desiree Croes, a indica cu dialuna anochi el a ricibi un notificacion informando cu e tratamento di e caso di apelacion di su cliente a keda posponi te proximo aviso pa motibo di problema tecnico den corte.
Manera ta conoci e trayecto di proceso di screening di candidato pa minister Mike de Meza a ser alarga pa motibo di diferente contratiempo cu a pone un impasse den e nominacion di de Meza, cual ainda e candidato pa minister y su ekipo legal ta luchando pa resolve.
Dia 17 di juli ultimo hues a entrega su decision relaciona cu peticionnan cu de Meza a entrega na Corte den Prome Instancia. E peticion di e ex-minister, ken actualmente ta den nominacion pa bira minister den e gabinete nobo di AVP-FUTURO, ta pidi pa clarificacion tocante e tipo y e motibo di e acusacionnan cu Ministerio Publico (OM) tin contra dje. Ademas, de Meza a pidi OM pa tuma un decision si ta persiguie of no prome cu 15 di augustus 2025.
Den su decision hues a splica cu OM a cumpli cu e decision di Corte di 25 di juni 2025, door di informa Mike de Meza riba e mesun dia ey cu e ta sospechoso den un investigacion cu tin andando y a pon’e na haltura di e articulo den ley riba cual e sospecho contra dje ta basa. Tambe hues a rechasa e peticion pa OM duna contesta prome cu 15 di augustus tocante un posible persecucion. Segun hues, e peticion aki ta di considera prematuro.
E tratamento di e caso di apelacion ta enfoca riba e dos puntonan primordial cu de Meza ya a presenta den corte. Primeramente de Meza y su ekipo legal ta pidi pa OM informa exactamente kico ta e acusacion(nan) cu tin contra de Meza, y no simplemente e articulo den ley pa cual e ta sospechoso. E otro punto den e caso di apelacion ta cu de Meza y su ekipo ta pidi pa duna un fecha pa dicidi si tin suficiente prueba pa persiguie.
E hues cu a rechasa e peticionnan mas recien di de Meza ta mesun hues cu a tuma decision prome biaha, pues segun abogado Croes tabata logico cu e hues lo no a cambia su decision. Aworaki den e tratamento di caso di apelacion tin tres diferente hues cu lo evalua si e decision di e hues den prome instancia tabata corecto of si den caso cu nan ta evalua cu e decision no tabata corecto, pues lo por bay over pa cambia e decision aki.
Mientras tanto gobierno a nombra Sr. Gervais “Baba” Rene Herdé como minister temporal cu lo tuma cartera di Infrastructura, Energia y Telecomunicacion—originalmente reserva pa de Meza. Prome cu e nombramento di Herdé, dr. mr. Arthur Dowers tabata encarga cu e carteranan aki.
