(NEW ORLEANS, WILLEMSTAD)—Gabriëla Pereira Dos Santos, 20 aña di edad di Willemstad, Corsou, tabata un di e candidatonan na Miss Universe 2022 cu a gara atencion den e competencia. E hoben a caba den e ultimo top 5.
Banda di Dos Santos, 84 dama a competi pa e corona di Miss Universe 2022, cual tabata diseña pa Mouawad. E panel di hurado tabata enclui Big Freedia, Mara Martin, Emily Austin, Olivia Quido, Myrka Dellanos, Sweta Patel, Miss Universe 1998 Wendy Fitzwilliam y Miss Universe 2010 Ximena Navarrete.
Anfitriona pa Jeannie Mai y Miss Universe 2012 Olivia Culpo, e anochi di coronacion tabata situa na Ernest N. Morial Convention Center na New Orleans, Louisiana, Merca. Zuri Hall y Miss Universe 2018 Catriona Gray tabata duna comentario den bibo.
“Si bo tabata tin e oportunidad di bay den discusion cu e lider di bo pais, kico lo bo kier discuti?” a puntra Dos Santos den e porcion di pregunta y contesta den e semifinal. E a contesta: “Mi ta kere tin hopi cu mester wordo treci den discusion.”
“Mi ta kere cu Corsou ta un pais multicultural y mi ta kere cu nos tin cu celebra tur cultura y discuti di e hecho cu tin biaha hende por sinti exclui, y nos no mester discrimina of tin ningun tipo di termento den e pais,” Dos Santos a continua.
Representando Merca, R’Bonney Gabriel, 28 aña di edad, a wordo corona como Miss Universe 2022. E runner-up tabata Amanda Dudamel, 23 aña di edad di Venezuela, y e segunda runner-up tabata Andreina Martínez, 25 aña di edad di Republica Dominicana.
Naci y lanta na Willemstad, Dos Santos ta papia Ingles, Spaño, Hulandes y Papiamentu. Su pasionnan ta enclui kickboxing, modelahe, biahamento y naturalesa.
Riba 29 di Mei 2022, Dos Santos a competi contra dos finalista na Miss Universe Curaçao 2022 na Renaissance Wind Creek Curaçao Resort na Willenstad, y a gana e titulo. El a bula di Corsou pa Miami, Florida riba 27 di december 2022, y di Miami pa New Orleans riba 3 di januari 2023.
Na New Orleans, Dos Santos a test positivo cu COVID-19. El a logra recupera despues di keda den cuarenta prome cu e competencia preliminaria di Miss Universe 2022 riba 11 di januari 2023.
