(AFP) – Polis Noruego a bisa diaranson cu tres ruman homber a keda aresta bao sospecho di un “bombardeo terorista” tocante un explosion na embahada Mericano na Oslo, cu a causa daño menor y ningun herido.
Fiscal di polis, Christian Hatlo a bisa un conferencia di prensa cu e rumannan, ciudadano Noruego di origen Iraki, a keda aresta na Oslo y cu polis tabata investigando e motibo.
“Ainda nos ta trahando di varios hipotesis. Un di nan ta si esaki ta un orden di un entidad gubernamental,” Hatlo a bisa. “Esaki ta algo natural mirando e obhetivo – embahada Mericano – y e situacion di seguridad den cual mundo ta awendia.”
Hatlo a bisa cu e investigacion lo busca pa clarifica exactamente ki rol e rumannan, kende ta den nan 20 añanan di edad y no tabata conoci pa polis, a hunga.
“Nos ta kere cu un di nan ta e persona cu a pone e bom pafo di e embahada y cu e otro dos tabata complice den e acto,” Hatlo a bisa reporteronan. El a bisa cu no ta descartando vinculo cu “rednan criminal” tampoco.
‘Actornan proxy’
Den su evaluacion anual di menasa, servicio di seguridad Noruego, PST a bisa luna pasa cu Iran, cu ta considera un di e menasanan principal contra e pais, lo depende riba “actornan proxy” incluyendo “rednan criminal” pa comete acto.
Diamars, embahador di Iran na Oslo a rechasa cualkier participacion di su pais den e explosion na e embahada. “Ta inaceptable cu ta acusando nos,” Alireza Jahangiri a bisa corant Noruego Verdens Gang.
Segun polis, e actornan di e bombardeo, describi como “poderoso” por tambe a actua pa nan propio motibo.
Embahadanan Mericano a ser poni bao alerta halto den Medio Oriente pa motibo di atake Mericano contra Iran. Varios a enfrenta atake mientras Teheran ta responde door di ataca facilidadnan industrial y diplomatico.
E explosion a tuma lugar diadomingo na entrada di e seccion consular di e embahada.
Dialuna a publica dos imagen di camara di vigilancia di un sospechoso bisti den paña color scur cu un hood riba su cabesa y bistiendo un tas. Mas o menos na mes momento cu e incidente a sucede, un video a keda upload riba e pagina di Google Maps pa Embahada Mericano. E video, cu ya a keda elimina, tabata parce di mustra e lider supremo fayecido di Iran, Ayatollah Ali Khamenei, kende a ser mata riba e prome dia di e atakenan Mericano-Israeli na Iran.
Segun noticiero publico Noruego, NRK, e persona cu a subi e video a skirbi den Persa: “Dios ta grandi. Nos ta victorioso.”
Polis tambe a habri un investigacion tocante esaki.
