Cuerpo Policial di Aruba a comparti riba nan rednan social tocante dos grupo di polis cu a bay den exterior pa curso y capacitacion, enfatisando asina e compromiso di cuerpo policial cu profesionalisacion di su trahadornan.
“Nos ta duna prioridad na e desaroyo y fortalecemento di nos conocemento profesional como parti di nos strategia di Cuerpo Policial Aruba,” KPA a skirbi. “Ademas nos ta continuamente traha pa mehora, construi y fortalece nos rednan y relacionnan. Nos ta presente tanto regional como internacionalmente y nos ta inverti den conocemento y cooperacion pa cu nos stakeholders.”
Den un post, KPA a conta cu iman pasa, 3 agente policial di Cuerpo Policial Aruba a sigui un curso di 1 siman na El Salvador. Varios Cuerpo den e region Caribense y paisnan Sur Americano a participa na e curso aki, cu a enfoca riba investigacionnan den crimen organisa.
Despues di bon experencia anterior cu e International Law Enforcement Academy (ILEA) na El Salvador, Cuerpo Policial Aruba ta mira bek riba un bon cooperacion, educacion, networking nobo y conocemento inspirador.
“Door di bon cooperacion cu otro, nos lo bira mas efectivo den combati criminalidad y asina mantene Aruba sigur!”
Ademas, den otro post, KPA a comparti cu recientemente agente policial Alvin Leonard a sali di Aruba pa bay Abu Dhabi pa sigui un curso internacional di liderazgo pa 6 luna. Despues di bon experencia aña pasa, esaki ta e di 2 aña cu KPA ta manda un colega pa e cu e curso aki.
Alto Comisario Arnhem conhuntamente cu Sra. Richardson hefe di departamento di K9-Unit y demas coleganan a bay aeropuerto internacional Reina Beatrix pa despedi pero tambe duna sosten na Leonard pa su viahe y curso.
“Nos ta desea nos colega hopi exito y inspiracion durante su e curso!”
