Lidernan Nativo Americano ta uniendo pa presiona oficialnan Mericano pa prohibi exploracion pa azeta y gas rond di un sitio sagrado cu ta conta cu structuranan masivo di piedra y otro resto di un civilisacion antiguo, pero cu ta enfrentando e postura pro- boramento di administracion di Trump.
Creando un ‘buffer’ rond Chaco Culture National Historial Park ta un problema andante, pero e tribunan ta luchando pa mas proteccion, mientras oficialnan Mericano ta sigui cu e plan di maneho pa e area rond di e sitio di herencia mundial, como tambe porcionnan grandi nort west di New Mexico y sur di Colorado.
Oficialnan federal repetidamente a nenga lease pa boramento dentro di 16km di e park, mientras tribu, ambientalista y arkeologonan a lanta preocupacion tocante e efectonan potencial riba sitionan culturalmente significante, manera structuranan ceremonial yama kiva fuera di e limitenan di Chaco.
Segun historiadonan, mil aña pasa e sitio tabata un hub economico y ceremonial pa e hende Pueblo.
Tribunan na New Mexico a reuni ayera na Acoma Pueblo, un comunidad Nativo Americano como 97km west di Albuquerque, entre e reunion mensual di All Pueblo Council of Governors.
Presidente di Nacion Navajo, Jonathan Nez, lider di e reserva mas grandi di Indian Mericano, tambe a presenta, hunto cu oficialnan di New Mexico y dos miembro di e delegacion congresional di e estado.
E tribunan kier lenguahe specifico den e plan di maneho federal di e area, cu lo preveni boramento cerca di e park, na luga di protesta cuatro biaha pa aña ora e industria di energia ta pidi benta di lease di algun parcela.
Administracion di presidente Donald Trump a pusha agresivamente pa habri pas tereno publico pa desaroyo di energia. Tambe a bay contra e deseonan di e tribunan y otronan door di haci dos monumento nacional mas chikito na Utah, cual tabata proteha artefacto tribal y otro tereno sensitivo.
Legisladonan y lidernan tribal a bisa durante un audiencia cu e comite congresional e luna aki, cu un revision na 2017 di areanan proteha nacionalmente pa presidentenan anterior no a tuma na cuenta e interesnan di e tribu, a pesar cu algun di e terenonan ta sagrado pa nan.
Senador Martin Heinrich di New Mexico a bisa ayera cu lo introduci legislacion pronto na congreso pa proteha e area rond Chaco Canyon. El a bisa cu no lo confia administracion di Trump pa inclui proteccion den e plan federal pa e area.
Comisionado pa tereno estatal na New Mexico, Stephanie Garcia Richard, a bisa un orden ehecutivo di su oficina ta spera proximo luna, cu lo haci e tereno rond Chaco fuera di limite pa cualkier lease di gas y azeta. Mayoria di e tereno rond di e park ta tribal y federal.
Accesibel unicamente mediante caminda di tera, Chaco ta dificil pa yega, y sostenedonan ta bisa cu nan kier proteha e sentido di ta remoto cu ta bin cu haci e biahe largo a traves di e sitionan antiguo cu ta permanece.
