Si kier crece, Gobierno lo mester asumi gasto pa mas persona di Customs and Border Protection

Triple A NV ta e instancia responsabel pa pasaheronan haya e miho servicio posibel ora di yega of bay di Aruba, pero ningun momento ta cuestiona e responsabilidad y deber di partnernan manera Inmigracion, esta IASA, y Duana pa haci su trabao. Esey tabata comentario di Chief Operacion Officer, COO, di Triple A, Jurgen Benschop.

Bon Dia Aruba a combersa cu e COO di Triple A a base di e kehonan di stagnacion na aeropuerto den fin di siman, unda pasaheronan mester a keda para oranan den rij prome cu nan por a pasa e diferente puntonan pa por a bay bek, particularmente, Merca.

“Den fin di siman nos tin como 5 mil pasahero cu mester sali di nos aeropuerto y hasta den siman, Dialuna por ehempel, nos a mira un cantidad halto di 3 mil pasahero. Esey ta un cantidad mas halto cu normal pa un dia di siman den e periodo di zomer,” Benschop a bisa.

Banda di e hecho cu tin hopi hende ta biniendo Aruba, nan y Triple A mester cumpli cu rekisitonan adicional. E ta conoci cu ora di yega, DVG y Hospital ta encarga pa e control di pasaheronan pa COVID-19. Hopi hende ta bin cu nan test y nan health app, pero mester prueba esaki tambe. Y esnan cu no a haci nan test, mester tum’e na aeropuerto. Pero awor Merca tambe ta exigi prueba negativo di COVID-19, hasta pa su ciudadanonan. Kiermen cu pasaheronan cu yega aeropuerto pa bolbe nan pais, mester duna prueba na aerolineanan cu nan a haci nan test y e ta negativo. “Esey ta pone cu e proceso di salida ta un poco mas complica, compara cu prome cu e pandemia. Nos di aeropuerto no ta diseña pa maneha un cantidad di proceso asina riba otro . Pa e motibo ey mes un di e factornan cu ta trahando riba dje ta yega na palabracion cu tur stakeholders pa agilisa e procesonan aki, pa medio di introduci sistema automatisa y percura cu tur e puntonan di proceso ta ekipa cu hende pa por maneha e fluho,” Benschop a splica.

E proceso mester cuminsa cu e busnan di touroperators cu ta baha e pasaheronan na aeropuerto. “Si cuater a cinco bus ta baha turista pareu ta haya 150 turista den un solo tiro den e sala di salida.” A cuminza papia cu nan pa plama e cantidad di turista cu mester yega , pero Benschop ta compronde cu esaki ta un ehercicio complica pasobra busnan ta pasa di hotel pa hotel pa busca turista y no necesariamente ta busca segun e ora cu nan mester biaha. Pero tambe ta papiando cu aerolineanan pa percura cu nan personal ta presente mas trempan pa agilisa e proceso di ‘check in.’ “Realidad ta si cu pa motibo di e cantidad di hende y rekisitonan, e rijnan ta bay te pafo. Nos ta buscando forma pa pone tentnan temporario pa por lo menos duna sombra.”

Revisa tur paso

Pa loke ta IASA, Benschop a bisa cu a traha riba facilidad automatisa di control di boarding pass, pa baha e presion riba personal di inmigracion y tambe facilita e fluho. E unico cu ta keda ta e verificacion di siguridad, unda ta controla e ticket, boarding pass y paspoort pa confirma cu ta trata di e persona cu derecho di biaha. “Si esey ta bon, e pasahero por drenta. “

A yega na palabracion cu IASA cu ta percura pa riba dianan druk tur e kiosconan ta ocupa cu suficiente personal, mientras cu ta haci uso tambe di e asina yama ‘e-gates’ cu ta lesa e boardingpass y paspoort.

:E siguiente punto di control ta siguridad cu ta maneha pa personal di Aeropuerto mes. Den e oranan mas druk ta percura cu tur cuater di e control di siguridad ta habri, pa hendenan por pasa e control aki den un forma mas lihe cu ta posibel.”

Customs and Border Protection

E reto cu ta bin despues ta na Customs and Border Proteccion, CBP, esta inmigracion y Duana Mericano, cu mayoria biaha no tin suficiente personal pa yega tur e kiosconan. Eynan ta unda e fluho ta pega hopi biaha. “Nos ta trahando cu nan con pa mira con por mehora e fluho. E reto grandi sinembargo ta cu e problema aki no ta un asunto entre aeropuerto y Gobierno di Aruba, sino ta un asunto cu Den Haag y Washington mester discuti.”

E presencia di CBP ta basa riba un tratado cu Merca y Reino Hulandes pa asina tin e pre-clearance Mericano na Aruba. “E unico cos cu Aeropuerto por haci ta pa acudi na Departamento Relacion Exterior pa informa nan y mira con nan por yuda den e situacion. E departamento ta na altura cu un di e problemanan di fluho na aeropuerto ta cu CBP no ta haci uso di henter e facilidad. Nan ta organisando reunionnan cu Gobierno Mericano y CBP, pa nos por haya mas personal di inmigracion y duana Mericano.”

E unico manera con CBP ta haya su placa den e proceso di pre-clearance, pa asina cubri su gastonan ta si tin pasahero. Hopi di e servicio di pre-clearance Mericano rond mundo a cera pa motibo cu no tabatin pasahero, y nan no tabata opera. Aruba tin e maximo na ‘manpower’ cu CBP a asigna, y si kier mas Gobierno di Aruba mester yega na un areglo pa mira con pa cubri e gastonan ey pa mas personal Mericano. “Nos ta trahando riba e proyecto di Gateway 2030. Nos ta expandiendo. Si nos kier sigui crece como destinacion, no por laga CBP ta e estorbo. Nos sigur ta consciente di esey y nos a informa Gobierno tambe.”

Na October lo cuminza papia cu Merca riba expansion di personal Mericano na Aruba y pa determina con lo paga e gastonan . Si Gobierno bisa cu no ta por asumi e gastonan adicional, ta nifica cu dificilmente por expande e operacionnan na aeropuerto.

Timeshare

E pregunta ta keda pakico no ta plama e vuelonan for di y pa Merca pa otro dia, y evita cu ta keda concentra hopi riba Diasabra. Segun Benschop e contesta ta simpel. “Timeshare. Un gran parti di bishitante pa Aruba ta bin pa nan timeshare cu en general ta di Diasabra pa Diasabra. Mayoria hotel ta draai di Diasabra pa Diasabra of Diadomingo pa Diadomingo. Y mayoria aerolinea kier bin den un espacio di tempo di 6 ora. Di 11or di mainta pa 5or di atardi, pasobra nan kier yega Aruba y sali di biaha pa logra nan conexionnan. Esey ta e realidad cu no ta bay cambia. Por keda pusha vuelonan riba otro dia pero un pasahero cu tin un timeshare cu ta cuminza riba Diasabra no ta bin Aruba riba Diaranson.”

Gateway 2030

Locual mester haci ta re-diseña e infrastructura pa e realidad aki y esey tabata e proyecto Gateway 2030 cu a cuminza ,pero cu mester a para pa motibo di e pandemia. E proyecto ta inclui extension pa check in, un sistema mas eficiente pa e maletanan, salidanan adicional. Awor a ehecuta unicamente fase 1-A cu ta expansion di e sala di salida y e sistema di maneha e maletanan. Awor ta bay evalua e siguiente fase cu mester bin. Tin e financiamento ainda, solamente cu no tuma tur e placa. “Nos a pidi e financiadornan pa wanta cu e placa, dependiendo di e tranchenan pa e diferente fasenan. Unabes cu tuma e placa, mester cuminsa paga interes riba dje.”

E fluho no por para

Benschop a bisa cu Triple A kier yega na un miho colaboracion entre tur e partnernan den e cadena aki di biahero, cu ta inclui inmigracion. “Nos di aeropuerto ta responsabel pa tur pasahero, irespecto unda nan ta bay. Pero si tur actor duna nan parti, e fluho por cana. Locual mester evita pa bin stagnacion. Y si cada stakeholder haci su parti, percura cu su kiosco ta habri na ora, cu tin suficiente hende pa procesa e cantidad di pasahero, e fluho ta cana. Pasaheronan no ta preocupa si nan ta mira cu tin movecion constante di e rij. Nan ta fada ora cu nan mester para y warda.”

Problema di luho

Hopi ta mira e rijnan di pasahero cu ta warda pa bolbe nan pais, pero segun Benschop, Triple A ta mira stagnacion den oranan piek di vuelo tambe. “Si ta yega ora tin otro cuater avion, facilmente por tin como mi hende cu mester pasa control di DVG, e control di IASA, busca nan maleta y finalmente pasa Duana. IASA y Duana mester haci nan control. Nos no ta cuestiona nan deber y responsabilidad pa haci e control. E unico cos cu nos ta pidi pa e control sosode na un forma mas eficiente pa e pasahero por keda cla mas lihe posibel.”

Locual tin ta un problema di luho, Benschop a ilustra. Pa motibo cu hopi pais ta cera of tin hopi caso di COVID-19 na otro pais, hopi turista a scoge pa bin Aruba. “Y netamente pa motibo di COVID-19, kizas hopi instancia no tabata prepara pa brinda servicio na un cantidad asina grandi di pasahero cu ta experienciando e momento aki.”

Potret ilustrativo.