(Infobae)—E presidente di Merca, Donald Trump, a sigura diadomingo cu e alto-al-fuego entre Israel y Hamas cu el a promove ta keda na vigor, a pesar di cu e forsanan arma di Israel a lansa varios atake na Gaza debi na e aparente violacion di e trato door di e grupo terorista Palestino.
E presidente a nota cu e lidernan di Hamas no tabatin conexion directo cu e supuesto violacionnan di alto-al-fuego y a culpa “algun rebelde entre nan.” “Pero di cualkier manera, e lo ser maneha adecuadamente. Lo ser maneha con firmeza, pero adecuadamente,” el a agrega.
Trump a expresa su speransa cu e trato, cual el a yuda media, lo keda stabiel. “Nos kier sigura cu tin paz cu Hamas. Nan tabata bastante rebelde. Nan tabata tira y nos ta pensa cu e liderazgo no tabata envolvi den esey,” el a alega.
Poco prome cu e declaracionnan di e presidente, su vice presidente JD Vance a minimisa e violencia reanuda na Gaza, sigurando cu lo tin un “subida y bahada” den e implementacion di e acuerdo.
E alto-al-fuego a ser negocia despues di un conflicto prolonga cu a genera consecuencianan humanitario serio den e Franha di Gaza, incluyendo destruccion masivo di infrastructura, desplasamento di e poblacion y un crisis di salud grandi.
E interupcion di e combatimento a permiti e comienso di esfuersonan diplomatico y e apertura di canalnan humanitario den e teritorio Palestino.
