(AFP)— Presidente Mericano Donald Trump a alaba Merca durante celebracion di su aniversario di 250 aña diasabra, describiendo e pais como “e logro supremo” den historia humano. Na mesun momento, el a usa e ocasion pa renoba su atakenan contra adversarionan politico den su propio pais, kende el a califica como comunistanan.
Den un discurso cu a cuminsa varios ora mas laat despues cu tormentanan a obliga autoridadnan evacua temporalmente e multitud na Washington, Trump a afirma cu bao di su presidencia Merca ta “mas orguyoso cu nunca.”
Aunke Trump a priminti un rally politico grandi pa pone su propio seyo riba e celebracion nacional, e Republicano di 80 aña a mantene su discurso mayormente den un tono patriotico tradicional.
“Pa dos siglo y mei, nos republica Mericano a representa e logro supremo di historia humano,” Trump a bisa dies miles di persona reuni riba National Mall.
Riba podium, e tambe a honra veteranonan di Segunda Guera Mundial y di Gueranan di Corea y Vietnam.
Despues, el a presenta e dos ultimo conflictonan como ehempel di e lucha contra “comunistanan”, ripitiendo e mesun mensahe cu el a duna diabierna anochi na e famoso monumento Mount Rushmore.
“Nos guereronan no a lucha contra comunismo riba camponan di bataya rond mundo pa despues laga e menasa ey bolbe mustra su cara mahos aki na Merca. Nos no lo permiti esaki pasa,” el a bisa.
Trump a enfatisa e tema aki repetidamente den ultimo tempo, den preparacion pa eleccion di mita termino na november, despues cu e brasa anti-establecimento di Partido Democrata a logra varios victoria den eleccion primario.
“E ta manera un cancer; bo mester corta esaki afo,” el a agrega.
E presidente Mericano tambe a usa su discurso pa gaba e campañanan militar recien contra Iran y Venezuela, bisando cu Washington a “destrui” capacidad militar di Teheran.
Sinembargo, e discurso tabata relativamente cortico pa standard di Trump, durando alrededor di 45 minuut.
“Nos stima Trump, nos a gusta su discurso,” Richard Sullivan, di 70 aña, cu a bin for di Virginia hunto cu su esposa Nancy y cu tabata bisti un camisa cu e texto Freedom 250, a bisa.
“El a pasa door di nos gran historia y a dedica palabranan na e veteranonan cu tabata presente. E ta haci nos orguyoso di ta Mericano.”
Despues di e discurso, un show enorme di klapchi a cuminsa. Trump a bisa cu esaki lo establece un record mundial como e show di klapchi mas grandi di mundo.
Mericanonan a desafia e ola di calor intenso den ciudadnan rond e parti oost di e pais pa celebra e aniversario di firmamento di Declaracion di Independencia for di Gran Bretaña na 1776.
Temperatura na capital a subi te un record di 39,4 grado Celsius, e temperatura mas halto registra pa 4 di juli, mientras 160 miyon Mericano tabata bao advertencia pa tempo extremo, segun Servicio Nacional di Meteorologia.
Mal tempo tambe a obliga adelanta e show di klapchi na New York y a provoca evacuacion di un concierto na Philadelphia y un celebracion na Riu Charles den Boston.
Condicionnan meteorologico tambe a menasa e discurso di Trump ora dies miles di persona a haya orden pa sali di National Mall varios ora prome cu su presentacion debi na tormentanan cu tabata acercando.
Mientras hopi hende a move pa e salidanan, situacionnan caotico a surgi ora otro asistentenan a nenga di bay of a purba drenta atrobe. Periodistanan di AFP a tende hende grita: “Charge!” y “Trump! Trump!”
Trump, sinembargo, a insisti cu e lo sigui cu su discurso. Den un entrevista cu Fox News, el a bisa cu si veteranonan di ‘D-Day’ durante Segunda Guera Mundial a logra enfrenta mal tempo, e tambe por haci esey.
“Experencia un tiki calor ta hopi menos cu loke hopi hende a sacrifica pa duna nos e libertad den e pais fantastico aki,” Randy Cole, di 62 aña y un ex-funcionario publico cu tabata presente na e festividadnan na Washington, a bisa.
Sinembargo, determinacion di Trump pa pone su mes y su marca politico na centro di e celebracion di aniversario 250 a pone enfasis riba e division profundo cu su di dos mandato presidencial a crea.
E division a resalta diasabra banda di Capitol Hill na Washington, unda hombernan cu mascara — algun cargando bandera di e Confederacion y otronan cu logo di e grupo supremacista blanco Patriot Front — a reuni pa grita: “Reclaim America!”
Pa hopi Mericano, e aniversario di 250 aña ta ofrece no solamente un momento di celebracion, sino tambe di reflexion.
Un encuesta di Quinnipiac University a mustra cu 61 porciento di Mericanonan ta kere cu Merca ta bibando conforme e idealnan describi den Declaracion di Independencia.
