(AP) – Presidente Donald Trump a denuncia ABC News su Mary Bruce como un “terible reportero” diamars y a menasa e red su licencia di emision despues cu el a haci 3 pregunta fuerte na e Cas Blanco.
E red su hefe di correspondencia pa e Cas Blanco tabata entre e reporteronan cu a laga drenta Oval Office pa haci pregunta na e Presidente y Prins Saudita Mohammed bin Salman. El a puntra Trump si ta apropia pa su famia haci negoshi na Saudi Arabia mientras cu e ta presidente.
Prome cu e por a contesta, el a dirigi un pregunta na e lider Saudita: “Su Gran Majestad, inteligencia Mericano a conclui cu bo a orkestra e asesinato brutal di un reportero. 9/11 famia ta furioso cu bo ta aki den Oval Office. Dicon Americanonan mester confia’bo? Y mescos pa abo, Mr. President.”
Despues di a puntra Bruce pa ken e ta traha, Trump a yama ABC “noticia falso” y a defende su famia su operacionnan di negoshi na Saudi Arabia.
E president a rechasa e resultadonan di inteligencia Mericano cu e prins tabatin culpabilidad di algun grado den e asesinato di 2018 di Washington Post su reportero Jamal Kashoggi, un critico di e reino Saudita. El a bisa cu “hopi hende no gusta Kashoggi, un ciudadano Saudita y residente di Virginia.
Di su banda, Prins Mohammed a bisa cu Kashoggi su fayecimento ta doloroso y un “gran eror.”
Trump despues a critica Bruce pa haci e prins un “pregunta terible.” El a papia tambe tocante Bruce su tercer pregunta, unda el a cuestiona dicon Cas Blanco ta wardando pa accion di Congreso pa revela mas detaye tocante e ofensor sexual Jeffrey Epstein su corespondencia, “Dicon no djis hacie awo?” Bruce a puntra.
“E pregunta no ta mi problema,” Trump a bisa. “Ta bo actitud. Mi ta kere bo ta un reportero teribel. E ta e manera cu bo ta haci e preguntanan aki.”
Despues di a atende e pregunta di Epstein, el a bolbe dirigi su mes na Bruce, bisando cu “hende sa mas cu kere bo falsedad.”
“Mi ta kere mester kita e licencia for di ABC paso bo noticia ta asina falso y asina fout,” el a bisa. “Y nos tin un gran comisario di FCC, e presidente, ken mester revisa esey pasobra mi ta kere ora cu bo drenta y bo ta 97% negativo pa Trump. Y despues Trump ta gana e eleccion cu un diferencia grandi. Esey ta nifica, obviamente, cu bo noticia no ta creibel. Y cu bo no ta creibel como un reportero.”
ABC News no tabatin comentario diamars tocante Trump su declaracionnan, cual a referi na FCC su presidente Brendan Carr, ken ta lidera e agencia federal responsable pa duna licencia na stacionnan di emision local.
Mientrastanto, Bloomberg News a duna un comentario tocante Trump refiriendo na un di su reporteronan, Catherine Lucy, como “Piggy” durante un sesion di pregunta y contesta diabierna ultimo riba Air Force One.
“Nos reporteronan di Cas Blanco ta ehecuta un servicio publico vital, haciendo pregunta sin miedo ni fabor,” Bloomberg News a bisa. “Nos ta keda enfoca riba reporta e problemanan di interes publico di manera husto y berdadero.”
