(AFP)—Presidente di Merca Donald Trump a bisa diaranson cu el a yega na un framework pa un acuerdo riba Groenlandia, cual el a menasa pa conkista for di Dinamarca, y cu el a retira su menasa di tarifa di importacion contra aliadonan Europeo.
Trump, ken a papia despues cu el a reuni cu hefe di NATO Mark Rutte na World Economic Forum na Suisa, no a duna hopi detaye tocante e supuesto framework ni si esaki a cumpli cu su demandanan pa control total di Merca riba e isla Artico.
“Nos a forma e framework di un acuerdo futuro tocante Groenlandia y, de hecho, henter e Region Artico,” Trump a bisa den un publicacion riba Truth Social.
“Basa riba e entendimento aki, mi no lo impone e tarifa di importacion cu tabata programa pa drenta na vigor dia prome di februari,” Trump a skirbi.
E tarifa di importacion tabata prepara pa afecta Dinamarca y tambe aliadonan cerca di Merca, incluyendo Inglatera, Francia y Alemania, cual a manda soldadnan na Groenlandia despues di e menasanan di Trump.
Papiando mas despues cu reporteronan na e resort Suiso di Davos unda e tene e conferencia, Trump a bisa cu e acuerdo lo ta na vigor “pa semper.”
Ora a puntr’e si Merca lo haya soberania riba e isla grandi pero poco pobla, Trump a duda y a bisa: “E ta e acuerdo mas desea a largo plazo, y mi ta pensa cu ta pone tur hende den un posicion hopi bon, specialmente den relacion cu seguridad y mineralnan y otro cos mas.”
“E ta un acuerdo cu hende a bula riba dje, realmente fantastico pa Merca, ta haya tur loke nos tabata kier,” el a bisa reporteronan.
Den un entrevista separa cu CNBC, Trump a yama esaki un “concepto di un acuerdo.”
“E ta un tiki compleho, pero nos lo splica esaki mas despues, pero e secretario general di NATO y ami, y algun otro hende tabata papiando y e ta e tipo di acuerdo cu mi tabata kier a logra.”
E buskeda di Trump pa tuma Groenlandia for di aliado di NATO Dinamarca a sacudi profundamente e orden global y e mercadonan.
Den un discurso mas tempran diaranson na World Economic Forum, Trump pa prome biaha a descarta uso di forsa, pero a exigi “negociacion inmediato” pa adkiri e isla for di Dinamarca. “Probablemente nos no lo haya nada si mi no dicidi usa forsa excesivo, unda nos lo ta, francamente, imparable—pero mi no lo haci esaki,” Trump a bisa den su discurso.
“Mi no mester usa forsa. Mi no kier usa forsa. Mi no lo usa forsa. Loke Merca pidi ta djis un luga yama Groenlandia.”
