(AP) — Presidente Mericano, Donald Trump a duna apertura na su participacion den e cumbre di Grupo di Siete dialuna sugeriendo cu Rusia y talbes hasta China mester ta parti di e organisacion.
E lider Mericano a indica cu e lo prefera di laga G7 bira G8, of posiblemente hasta G9, maske Rusia y China notablemente lo ta gobiernonan autoritario den un organisacion di cual su miembronan ta democracia.
Trump a bisa cu ta “un eror hopi grandi” pa elimina Rusia na 2014 despues cu a anexa Crimea, un movida cu a precipita e invasion mas amplio di Rusia na Ucrania na 2022. E comentarionan a agrega mas complehidad regardando interesnan di Trump mientras e ta programa pa reuni awe cu presidente Ucraniano, Volodymyr Zelenskyy tocante pone un fin na e guera inicia pa e invasion.
“G7 antes tabata G8. Barack Obama y un persona yama Trudeau no tabata kier pa tin Rusia aden,” Trump a bisa referiendo na Justin Trudeau, eligi prome minister Canades un aña despues cu a retira Rusia di G8. Stephen Harper tabata prome minister Canades e tempo ey.
“Mi ta kere bo no lo tin un guera awo si bo tabatin Rusia aden, y bo no lo tin un guera awo si Trump tabata presidente cuatro aña atras,” Trump a bisa. “Nan a saca Rusia, cu mi a bisa tabata un eror hopi grandi, maske mi no tabata den politica e tempo aya.”
Trump a agrega cu lider Ruso, Vladimir Putin “ya no ta na mesa, pues ta haci bida mas complica.”
Contestando un reportero si tambe mester agrega China, Trump a bisa: “No ta un mal idea. Mi no ta mind esey si un hende kier pa djis mira China bin aden.”
E presidente Mericano a bisa cu ta importante pa lidernan mundial por papia cu otro na cumbrenan.
Trump tabata papiando cu reporteronan despues di reuni cu prome minister Canades, Mark Carney, kende ta anfitrion di e cumbre na Kananasksi, riba e Rocky Mountains.
