(AP) — Ex-presidente Mericano, Donald Trump a demanda e testigo clave den su caso criminal ayera, acusando e ex-abogado y fixer Michael Cohen di “daño amplio na su reputacion” pa papia publicamente di e pago pa silencio den centro di e caso.
E demanda, entrega na Miami, a ofrece un bista di argumentonan cu sigur ta bay forma parti di defensa di Trump contra cargonan di falsifica documentonan interno di negoshi pa disfrasa pagonan haci durante e campaña electoral na 2016 pa silencia acusacion di encuentronan sexual fuera di matrimonio.
E demanda ta acusa Cohen di viola un acuerdo di confidencialidad cu el a firma como condicion di su empleo, violando standard di etica pa abogadonan y “plama falsedad” tocante Trump “cu mal intencion y cu meta di sirbi su mes.” Ta buscando mas di mita miyon dollar for di Cohen.
Trump no ta demandando Cohen specificamente tocante su testimonio na un gran hurado den e caso criminal, pero e ta cita esaki den sosten di un argumento cu su ex-abogado a busca pa enrikece for di su rol a traves di e publicacion di dos buki, un serie di podcast y apariencianan den medionan di comunicacion.
Vocero di Cohen, abogado Lanny Davis, a bisa cu e demanda no ta bay stop e cooperacion di Cohen cu fiscal.
