(Infobae) – Presidente di Merca, Donald Trump, a duna orden diahuebs pa e reapertura di espacio aereo comercial riba Venezuela, un medida cu ta parti di e proceso di reconfiguracion di relacion bilateral despues di e captura di e narco-dictador Nicolas Maduro.

E presidente Mericano a sigura cu e instruccion a ser comunica na cabes di e regimen Chavista, Delcy Rodriguez, y cu e proceso mester ser activa inmediatamente.

“Mi a caba di papia cu e presidente di Venezuela y mi a inform’e cu nos lo habri henter e espacio aereo comercial riba Venezuela,” Trump a declara durante un reunion cu su gabinete na Cas Blanco.

Segun e, el a duna orden na Secretario di Transporte, Sean Duffy, y otro funcionarionan, incluyendo comandantenan militar, pa “no mas tarda cu final di dia, espacio aereo riba Venezuela lo ta habri y avionnan por bula pa Venezuela”.

Trump a afirma cu e reapertura lo permiti ciudadano Mericano pa biaha atrobe na e pais Sur Mericano.

E decision ta bin mientras e administracion Republicano ta sigui cu pasonan preliminar pa reestablece presencia diplomatico na Caracas.

Paralelo cu e anuncio presidencial, aerolinea American Airlines a informa cu e ta evaluando reanuda su vuelonan diario pa Venezuela, un decision cu lo depende di e autorisacion di Gobierno di Merca y di analisisnan adicional riba condicion di seguridad.

E compania a suspende henter su operacion pa e destino aki na 2019. Desde e tempo ey, e Federal Aviation Administration (FAA) a mantene tur ruta di aerolinea Mericano pa e pais cera y a emiti advertencianan repetitivo tocante e “situacion potencialmente peligroso” den espacio aereo Venezolano.

E siman aki, Departamento di Estado a notifica Congreso di Merca cu e tabata implementando un enfoke gradual pa reanuda operacion limita di embahada Mericano.

Den carta manda na comitenan di Camara y Senado, e agencia a indica su intencion di desplega personal temporal pa cumpli cu funcionnan diplomatico “selectivo”.

“Nos ta skirbi pa notifica e comite di e intencion di Departamento di Estado pa implementa un enfoke gradual pa posiblemente reanuda operacion di Embahada na Caracas,” e texto, obteni pa The Associated Press, a indica.

Relacion entre e dos pais a collapse na 2019, ora Merca a fortalese sancionnan y a cera su sede diplomatico, acompañando e medida cu un advertencia di biahe pa su ciudadano.

E reestablecemento di vuelonan comercial tabata un demanda di e organisacion di negoshi y di diaspora Venezolano na Merca, cu a haya cu contacto cu famia y gestion di tramite consular ta birando dificil.

Den e contexto anterior na captura di Maduro, FAA a renoba su alerta pa aeronave civil, citando peliger deriva di actividad militar den region.

E cerrie di espacio aereo a responde tanto na motibo di seguridad como na campaña di presion riba e regimen Chavista, acusa pa e administracion di Trump di lidera e “Cartel de Soles” y di usa structura di Estado pa actividad di trafico di droga y corupcion.

Actividad militar Mericano aumenta den Caribe, hunto cu presencia di flota naval y operacion di intercepcion contra barconan sospechoso, a lanta tension regional den lunanan reciente.

Administracion di Trump a hustifica e accionnan aki como parti di su strategia anti-narcotico, paralelo cu sancion economico y diplomatico. Despues di e caida di Maduro y comienso di e proceso di transicion politico, Cas Blanco a cuminsa revisa su politica restrictivo y explora un normalisacion progresivo di e relacion bilateral.

E reapertura di espacio aereo ta considera como un prome paso clave pa recuperacion di conectividad, reactivacion di negoshi y posible reintegracion di Venezuela den sistema di transporte internacional, den marco di un proceso politico cu ainda ta incierto y bao di warda atento di comunidad internacional.