(AP) — Presidente Donald Trump dialuna a firma e legislacion ‘Take It Down’ pa bira ley, un medida cu ta impone castigo pa explotacion sexual, cu prome dama Melania Trump a yuda pasa den Congreso, y e tambe a firm’e.
“E merece firm’e,” e presidente a bisa.
Despues cu e prome dama a agrega su firma, e presidente a mustra e documento cu ambos nan nomber na e audiencia na e ceremonia di firma den Hardin di Rosa di Cas Blanco. E firma di Melania Trump ta simbolico, pasobra prome damanan no ta eligi y no tin rol formal den firma legislacion.
Na maart, Melania Trump a usa su prome presentacion publico desde cu el a reanuda su rol como prome dama pa biaha na Capitol Hill pa lobby miembronan di Congreso pa aproba e ley, despues di su aprobacion den Senado. Na e ceremonia di firma, el a yama e ley nobo un “victoria nacional” cu ta bay protege mucha di explotacion online, incluyendo mediante uso di inteligencia artificial pa traha imagen falso.
“AI y rednan social ta manera mangel digital pa e proximo generacion, adictivo zoet y diseña pa tin un impacto riba e desaroyo cognitivo di nos muchanan,” el a bisa. “Pero a diferencia di sucu, e tecnologianan nobo aki por ser usa como arma, duna forma na creencia, y tristemente, afecta emocion y por hasta ta mortal.”
E presidente a bisa cu e proliferacion di imagen traha usando AI ta nifica cu “cantidad di muhe a ser acosa cu deepfakes y otro imagen explicito distribui contra nan boluntad.” El a bisa cu loke ta sucediendo ta “djis horiblemente fout.”
“Awe, nos ta haciendo e totalmente ilegal,” Trump a bisa.
E ley ta hacie un crimen federal pa “publica cu conocemento” of menasa di publica imagennan intimo sin permiso di un persona, incluyendo “deepfakes” genera pa AI. Website y compania di rednan social ta bay ta rekeri pa elimina material asina dentro di 48 ora despues cu un victima solicit’e. E plataformanan tambe mester tuma stap pa elimina contenido duplica.
Hopi estado ya a prohibi e diseminacion di deepfake sexualmente explicito of porno di vengansa, pero e Ley Take It Down ta un ehempel inusual di reguladornan federal imponiendo riba companianan di internet.
E ley, sosteni pa Senadornan Ted Cruz y Maria Elvira Salazar, a ricibi sosten abrumante bipartisano den Congrso, pasando na april cu un voto 409-2, y pasando Senado cu sosten unanime.
Pero e medida tin critico. Defensornan di libertad di expresion y gruponan di derecho digital ta bisa cu e ley ta mucho amplio y por conduci na censura di imagen legitimo, manera pornografia legal y contenido LGBTQ. Otronan ta bisa cu e por permiti gobierno pa monitor comunicacion priva y mina proceso debido.
