ORANJESTAD – E industria di Turismo ta esun di mas importante pa pais Aruba, cual ta hacie necesario pa continuamente tin desaroyo y ideanan nobo cu ta creativo y fresco pa nos bishitantenan. Pa e motibo aki, entrante 29 di mei 2019, Aruba lo cera conoci cu ‘Island Festival’, den centro di San Nicolas.
Cu e introduccion di e festival aki, nos hendenan local lo traha pa promove pais Aruba den un forma simpel pero amistoso y yen di ambiente. Di e forma aki, lo laga e turista experencia y biba nos herencia cultural y patrimonio den e miho expresion autentico cu ta posibel. Durante aña 2019, tur edicion lo tuma luga den e caya principal di San Nicolas, como cu San Nicolas lo bira e prome districto cu lo bay haci e experencia di nos bishitantenan uno memorabel. Pues 29 di mei 2019, “Arubameets in San Nicolas!”
Inscripcion Vendors
Desde awo caba, tur persona/bendedo cu ta interesa pa participa na Island Festival por haci esaki door di manda un e-mail na islandfestivalaruba@gmail.com. Lo ricibi un formulario di aplicacion y asina cu e ser ricibi, e peticion lo wordo procesa. Ultimo dia pa manda e-mail lo ta diabierna 3 di mei.
E idea ta pa por satisface e apetit di nos bishitantenan, di tal forma cu nan por disfruta di cumindanan local y multicultural. Si bo ta sinti cu bo por haci esaki y kier aporta na engrandece nos industria di Turismo, manda bo aplicacion mas lihe cu ta posibel!
