Formador tin casi dos siman cu el a haya e tarea pa Forma un Gobierno. Sinembargo el a bisa cu a pesar cu tin acuerdo di principio, e formacion lo tuma su tempo.

Un di e aspectonan cu ta hunga un rol den formacion di Gobierno ta screening di e candidatonan pa bira Minister. Segun e Formador a bisa, no a yega na e punto ey ainda. Pero na momento cu tin e candidatonan, tur mester firma un declaracion pa nan pasa den e screening y mester declara tur loke cu nan ta kere cu por pone e Gobierno den un posicion incomodo. Pa por bira Minister, mester pasa e screening completo.

Den e ultimo caso, unda drs. Marisol Lopez Tromp mester a bira Minister na luga di Otmar Oduber, por a experencia cu esaki a tarda un poco mas cu normal. A menciona e tempo ey bou di pueblo.

Esaki ta un di e motibonan cu pueblo ta pidi pa mas transparencia den e proceso aki. Formador ta transparente cu e proceso cu tin andando, a reunionnan cu ta sostene. Pero mester bini transparencia den e candidatonan pa bira Minister. Asina por ehempel, pueblo kier haya sa cada detaye di e proceso, cual ta e nombernan cu a wordo manda pa screening. Si tin un problema cu un candidato  no por bira Minister, pueblo mester sa di esaki tambe.

E nombernan di e candidatonan ta bay pa Veiligeheidsdienst Aruba. E departamento aki ta cay bou di Minister du Husticia. Nan mester defende interesnan di Aruba den mantencion di democracia, den integridad di maneho, siguridad interno,  y percura, pa unda ta necesario, defende interesnan di Aruba y Reino Hulandes.

Nan mester acumula informacion riba persona y instancianan, mirando e trabounan cu nan mester haci, pa sigura cu nan lo no ta un peligro. Nan ta haci investigacionnan di siguridad pa funcionnan di confiansa. Mester sigui y tuma medidanan pa protege interesnan di Aruba, y unda ta necesario wanta informacionnan di Reno Hulandes secreto.

Tur informacion acumula, e director ta comparti esaki cu Ministernan.

E ariba menciona ta nifica cu e candidatonan mester ta intachabel.  Nan no por tin debe di belasting, no por tin problema cu husticia ni otro tipo di problema cu por daña su imagen of e Gobierno di cual e mester forma parti.

Pa e motibo aki tambe den un parti di e screening ta puntra e candidatonan si nan ta dispuesto pa renuncia funcionnan of nevenactiteiten cu no ta compatibel cu e funcion di minister.

No ta conoci cuanto tempo e fase di screening lo dura. Den pasado tin casonan cu a bay masha lihe y otronan a tarda un poco. P’esey pueblo ta spera mas transparencia den e parti aki pa yega na un Gobierno pa pais Aruba.