Den luna di april minister di Husticia Arthur Dowers a anuncia lockdown na KIA pa motibo di un cantidad halto di caso di tuberculosis (TBC). Bon Dia Aruba a tuma contacto cu KIA pa confirma cu lockdown ya no ta vigente mas y ta ricibiendo bishita normal.
Despues cu a bira conoci cu tin casonan di TBC den KIA, minister Dowers a manda haci un investigacion pa asina determina e cantidad di caso y a gravedad di esakinan. Despues di e investigacion a sali na cla cu mas ci ocho persona tabata contagia, pero den e casonan aki e personanan tabata asintomatico, locual kiermen cu e persona no ta riesgo hopi grandi pa expande e TBC.
E personanan cu tabata contagia a ser trata y a pone nan hunto den un situacion di isolacion pa asina reduci e riesgo di mas contagio.
Tambe a tuma cierto medidanan den e instituto y un di nan tabata cu a limita bishita di famia, unicamente por a busca por ehempel paña pa laba, pero no por a haci bishita ni tin contacto cu e persona, y comunicacion lo a bay di manera virtual y no personal.
Contactnan cu corte a tuma luga di mesun forma pa reduci e transporte di hende y e posibilidad pa contamina otro areanan.
Un luna despues, no tabatin mas informacion tocante e situacion ni si e lockdown tabata vigente ainda. Bon Dia Aruba a tuma contacto cu KIA pa asina puntra si e lockdown tabata vigente y si tabatin algun medida implementa.
Di parti di KIA a informa cu e lockdown no ta vigente mas y cu tur cos ta back na normalidad. Tambe a indica cu no tin niun medida di seguridad tampoco na vigor pa tene cuenta cune na momento di haci bishita na e instituto.
