Departamento di Asunto di Consumidor ta den e ultimo fase di un investigacion grandi cu nan a cuminsa na final di aña pasa. E ta parti di e resultado di un investigacion previo cu nan a purba di haci cu e ordo di abogado, pero e reaccion tabata hopi pober, y e conclusionnan no tabata representativo, segun sr. Luciano Maduro di e departamento menciona.
E contacto cu e abogadonan tabatin como intencion di sa nan sugerencia, ya cu nan ta traha riba diferente caso entre nan esun di proteccion di consumido. P’esey e departamento aki a acerca su persona pa wak si nan por tin un idea -a base di e ley vigente- riba e autoridad cu e departamento aki tin, pa wak kico por haci den margen di ley pa haci e caminda di consumido mas facil ora cu consumidornan mester defende nan derecho.
Nan a sigui investiga pa medio di encuesta, si berdaderamente ta existi un necesidad of forma alternativo pa resolve kehonan di consumido y tambe kico ta e miho forma pa resolve e tipo di keho aki.
Consumidor mester haci tur cos
Sr. Maduro a splica cu e caminda di consumido actualmente ta pa e consumido haci tur cos basicamente riba su mes. Den caso cu e consumido tin un keho valido contra un producto of servicio, e tin cu manda un carta na e negoshi (cualkier sorto di negoshi), caminda e consumido ta duna un plaso rasonabel pa e negoshi reacciona, ya sea cu nan ta acepta of no e keho. Si e ta acepta e keho logicamente e ta compromete su mes pa yuda e consumido.
Sr. Maduro a indica cu ta poni den ley cu e negoshi tin cu reacciona riba carta di keho di e consumidor. E ta haya cu e negoshi ta pensa cu e ta un opcion, locual no ta corecto.
“E problema ta cu e negoshi tin cu reacciona, pero e unico autoridad cu por impone e ley ariba e negoshi ta corte”, segun sr. Maduro.
Tin negoshi cu no ta haci esey, y esaki ta forsa e consumidor pa tuma e paso legal mas leu cu ta esun di busca un abogado y bay corte. E termino pa un negoshi reacciona ta un poco ambiguo den ley, ya cu ta para cu e mester ta den un termino rasonabel. Na Aruba ta wordo tuma Hulanda como punto di referencia caminda e negoshi mester reacciona den un termino di dos siman.
Ta asina cu e resultado di studio aki ta mustra cu mientras cu mayoria di consumidor ta na fabor di un Comision di Consumidor pa atende y resolve cierto kehonan, e doñonan di negoshi ta opta pa nan bay corte pa atende cu casonan chikito.
