Aruba su cifranan di turismo ta keda subi. Sinembargo, un bista mas detaya riba e cifranan ta mustra algo cu posiblemente no ta facil di mira y esaki ta e hecho cu e isla ta yenando di bishitante na un manera diferente compara cu antes, cu consecuencia pa vivienda, impuesto y bida diario.
Segun Aruba Tourism Authority (A.T.A) su rapport mensual pa mei di 2026, Aruba a ricibi 133.680 bishitante di e categoria ‘Stayover’ na mei so, cu Nort America responsable pa 74,4% di e yegadanan, Sur America responsable pa 19.0%, Europa 4,1% y otro regionnan 2,5%.
Te cu mei, Aruba a ricibi 702.158 bishitante den e categoria aki y 505.026 pasahero di crucero, cual hunto ta bira un total di 1.207.184; un aumento di 10,4% y 7% respectivamente compara cu e mesun periodo na 2025. E total pa e categoria ‘Overnight stay’ a yega te 4.815.288, cual ta un aumento di 10.8%.
Esaki riba papel ta algo sumamente positivo. Pero aki ta e parti cu ta pinta un imagen diferente; e crecemento aki no ta bin for di e mesun luga cu antes.
E mesun data di A.T.A ta mustra cu e parti cu ta creciendo mas lihe den e sector di turismo na Aruba no ta hotel, sino e categoria cu A.T.A ta label como “others,” y esaki ta cubri hotel chikito, cas priva y ofertanan riba plataforma manera Airbnb of Booking.com. Te cu mei, e categoria aki a mira mas di 267.000 bishitante, cual ta un aumento compara cu e mas o menos 228.000 di e aña anterior. Esaki ta un aumento di 17,3% y ta riba e crecemento pa turismo en general, cu tabata 10,4%.
E cambio ta cla te hasta den e categoria di ‘overnight stays’. E categoria di “others” ta responsable pa net mas di 2 miyon anochi te awo e aña aki so, cual ta alrededor di 41,6% di tur anochi di turista, y un aumento for di e 39% mira na 2025. Si compara esaki, timeshare tabatin 28,4% di e anochinan, hotel tipo European Plan – cual ta nifica solamente e camber sin cuminda inclui – 22,3% y resort ‘all-inclusive’ apenas 11,4%.
Tur esaki no ta nifica cu tipo di acomodacion tradicional no ta mira crecemento, e realidad ta mustra cu si tin un crecemento, solamente cu un poco menos velocidad. Cifranan pa bishitante di ‘all-inclusive a aumenta cu 3,3% (mas o menos 90.000 pa 93.000), cu anochi mirando un aumento di 1,3%. Timeshare a keda practicamente mesun cos, mientras cu hotel European Plan a mira un crecemento di 13,2% di bishitante y 14,4% den anochi.
E conocemento aki ta importante pa motibo cu turismo ta un pilar principal pa economia di Aruba, pues con esaki ta structura tin consecuencia cu ta bay mas leu cu hotel. Segun A.T.A su rapport “Spending Insights 2025”, basa riba mas cu 8.000 encuesta na aeropuerto, turista a gasta en total 3.06 biyon dollar riba e isla na 2025. Esaki ta un averahe di $297 pa persona, pa dia y $2.019 pa persona pa un estadia completo, cu $4.989 pa cada grupo biahero.
Mayoria di e gasto aki ta bay na acomodacion mes, sigui pa cuminda y bebida fuera di unda nan ta kedando y dentro di esaki.
Den otro palabra, unda un turista ta keda no ta afecta e un negoshi ey so. E ta forma ken ta beneficia di e dollar di turista, con hopi entrada di impuesto gobierno por colecta y con turismo ta interactua cu e barionan unda ciudadanonan mes ta biba.
Aunke Bon Dia Aruba a yega di papia ampliamente tocante e impacto negativo cu Airbnb’s of acomodacion informal por tin riba Aruba, si e regulacion adecua cu ta extremadamente necesario keda implementa, nos por mira impacto positivo tambe.
E placa di loke ta yama ‘short-term rentals’ por bay directamente na propietarionan di cas local, of famianan cu ta huur un camber of un apartamento, haciendo cu e dollar di turista por cuminsa circula di manera mas amplio y mientras tambe ta sigura cu gobierno por colecta impuesto di manera mas sigur y directo.
Tambe tin mas oportunidad pa negoshi, sea propietarionan, sector di limpiesa, guia turistico of negoshi chikito di hospitalidad por haya mas fuente di ingreso cu no ta rekeri e capital pa opera un resort por ehempel.
Otro impacto positivo ta e cu e diferente tipo di acomodacion, for di apartamento mas accesible te na resortnan ‘all inclusive’ ta duna Aruba e oportunidad di por ricibi y tin opcion pa un mescla mas amplio di bishitante y generacionnan na mesun momento.
Esaki ta trece dilanti otro punto importante cu por mira den e data di A.T.A, y esaki ta cu e cambio den preferencia di acomodacion ta impulsa pa e hecho cu e edad di bishitantenan di Aruba ta cambiando, y generacionnan mas hoben ta creciendo hopi mas lihe cu e mercado en general.
Durante mei, Aruba su grupo di bishitante mas grandi tabata e asina yama ‘Baby Boomer’, pero e grupo aki a crece cu menos di 5% y esaki ta bao e crecemento general di e mercado cu ta mas o menos 10%. Esaki ta nifica cu su parti den tur bishitante en general realmente a disminui for di casi 28% na 26%.
Mientrastanto, tur otro generacion mas hoben ta creciendo mas lihe cu e mercado. Gen Z, naci entre mas o menos 1997 y 2012 cu edad entre 14 y 29 aña na 2026, a crece cu mas di 15% for di 90.000 te cu casi 105.000 bishitante. Gen A, naci for di mas o menos 2013 en adelante cu edad entre 0 pa 13, a crece casi 15% for di 35.000 te cu mas di 40.000 bishitante. Millennials, naci entre 1981 y 1996, cu entre edad entre 30 pa 45, a crece cu casi 13% for di 150.000 te cu casi 170.000 bishitante.
E combinacion aki ta ilustra e cambio den turismo cu nos a cuminsa mira na Aruba. Un aumento den Gen A usualmente ta nifica cu tin mas famia ta biaha hunto, no cu tin mas hoben ta biaha nan so. Famia tin mester di un opcion diferente na un solo camber di hotel, nan mester mas camber, acceso na laundry, un auto y flexibilidad pa ahusta nan estadia, cual ta algo mas dificil pa haya na un hotel clasico of un pakete crea rond di un solo camber of un tarifa fiho.
Bishitantenan Gen Z y Millennial ta agrega otro elemento na e mesun moda. Nan tin e tendencia di reserva di manera digital, compara prijs y flexibilidad cu mas importancia y no ta automaticamente busca un acomodacion ‘all-inclusive’ of un timeshare. Nan ta hopi mas probable di scoge un hotel European Plan, apartamento, villa of huur priva, cual ta exactamente e tipo di acomodacion cu segun e cifranan di A.T.A ta mirando un crecemento mas lihe.
Mester nota cu e rapport di A.T.A no ta conecta generacion specifico na tipo di acomodacion specifico, pues no por bisa cu certeza ni tampoco di manera definitivo cu famianan of Gen Z ta yenando e categoria di ‘others’. Sinembargo e dos factor ta canando paralelo; Aruba ta mirando pasahero y famia relativamente mas jong, na mesun momento cu e crecemento mas lihe di acomodacion ta sucediendo fuera di e modelo tradicional.
E combinacion aki ta importante pa Aruba pa motibo cu pasaheronan jong y famianan no solamente mester di acomodacion diferente, nan ta gasta placa di manera diferente tambe. Compara cu turistanan cu ta prefera un resort ‘all-inclusive’ por ehempel, famianan of bishitantenan mas hoben cu talbes ta mas consciente di prijs, ta gasta nan placa di manera mas amplio manera den supermarket, restaurant, riba tour y huur di auto na luga di concentra esaki den un resort.
Esaki ta trece beneficio pa economia di un manera mas amplio, mirando cu e placa di turista ta cuminsa core door di negoshinan chikito local tambe.
Sinembargo di otro banda esaki ta aumenta e presion cu Bon Dia Aruba a yega di describi antes, pues mas di e actividad aki ta sucede den barionan residencial of huur priva, agregando presion den diferente area di bida diario, manera riba trafico por ehempel, precisamente na un momento unda e parti aki di mercado ta creciendo cu mas velocidad.
Aruba no solamente ta ricibiendo mas turista, sino na mesun tempo e ta ricibiendo turista cu un set diferente di necesidad; mas famia, mas bishitante hoben, y mas necesidad pa flexibilidad.
E preguntanan cu awo ta riba mesa di gobierno y e autoridadnan concerni ta unda e bishitantenan ta kedando y si e reglanan cu ta goberna e acomodacionnan aki ta na mesun nivel y velocidad cu su crecemento, y esaki ta precisamente e preguntanan riba cual nos mester keda pone atencion, pa motibo cu un respuesta y accion concreto ta berdaderamente necesario pa Aruba mantene un relacion sano cu turismo.
