Dialuna atardi a drenta informa cu a haya un turista cu a hoga den lama na Boca Catalina. Na yegada di polis a bin compronde cu otro turistanan a nota e victima ta drief den lama y nan a hib’e na canto mientras ta duna CPR.
Na yegada di ambulance a tuma over CPR, pero despues di basta rato no por a logra resucita e victima. A notifica e fayecimento di e turista na e sitio mes. Segun a informa, aki tabata trata di un turista cu tabata disfrutando cu su yiu kedando na un Airbnb na Palm Beach.
Bon Dia Aruba ta expresa palabranan di condolencia na e famia di e fayecido.
Reaparicion incomun
Den e ultimo añanan por a nota varios caso unda turistanan ta fayece pa via di hogamento of ta experencia problema di salud mientras nan ta disfruta di un dia na lama. E aña aki so a mira al menos cinco caso confirma unda turistanan a experencia problema di salud, unda mayoria di nan a resulta den fayecimento.
Den mayoria caso, aki ta trata di adultonan mayor cu a ser haya inconsciente of cu a experencia problema di salud. Sinembargo, tambe tabatin un caso unda un hoben di 17 aña no por a hala rosea y meter a ser atendi pa ambulance. E tempo aki autoridadnan a nota cu e hoben a guli basta awa y a mand’e cu urgencia na hospital. No a confirma mas kico exacto a resulta di e hoben.
Den januari Bon Dia Aruba a tuma nota caba di e reaparicionnan incomun aki, unda a trece dilanti algun punto di ciudadanonan pa amplia medidanan di seguridad na nos playanan. Esaki lo yuda disminui e chance di hogamento y e lifeguards lo por reacciona mas lihe tambe den caso cu un persona encontra dificultad den lama evitando cu lo termina den un suceso lamentable.
Otro factor cu ta importante pa tene presenta ta e hecho cu Aruba ta calor, solo ta cayente y talbes den lama hunto cu e aire no ta sinti asina calor, pero asina mes e cayente di e solo por tin efecto riba e curpa y por causa cu e persona ta bira malo y hoga.
