Turista crucero cu impacto di 85,5 miyon dollar riba nos economia

Ayera pa di tres aña consecutivo a tuma luga e Cruise Symposium Aruba 2017, organisa pa oficina di  turismo Aruba (ATA). Esaki ta e delaster conferencia local cu ATA ta organisa e aña aki. Mientras cu e conferencia anual di ATCA cu nan ta organisa pa nan socionan di Nort America cu inicialmente a keda posponi pa causa di e horca Irma, definitivamente a keda cancela pa e aña aki.

Directora di ATA, Ronella Tjin Asjoe-Croes ta declara na Bon Dia Aruba cu nan a tuma e decision aki considerando diferente feedback despues cu ATA a puntra tur e operadornan cu ta bende nos producto turistico den e mercado aki. Sinembargo ATA ta compilando tur informacion di nan y tambe nan ta den dialogo cu nan socionan strategico na Nort America di otro manera.

Pa loke ta trata e simposio di anual di crucero realisa na Aruba Renaissance Convention Center, el expresa su satisfaccion un biaha mas cu e contenido y asistencia di e simposio aki. Segun directora di ATA, nan ta bin cu e tipo di simposio aki pa contribui cu e calidad di bida di nos propio comunidad. Pero e ta haya importante pa mustra cual ta e impacto di e industria di turismo crucero.

Di locual ATA a proyecta te cu  final di aña 2017, e industria aki por tin un impacto di 85,5 miyon dollar simplemente considerando loke e bishitante ta gasta. Si e cifra aki ta wordo compara cu aña pasa, esaki ta 21% mas di loke a keda registra aña pasa.  “Mi ta kere volumen ta un cos, pero e  punto di mas importante ainda ta impacto economico y ingreso pa pais Aruba”.  E datonan cu a keda presenta a mustra cu nos turismo ta moviendo riba un direccion “mi ta kere bon”, segun sra. Tjin Asjoe-Croes.

El a splica cu ATA ta bin cu un simposio dedica na turismo crucero separa, ya cu e sector aki di nos turismo ta hopi prometedor. Pero otro factor cu nan ta hacie separa ta cu e dinamica di esaki ta totalmente diferente cu locual ta e base di turismo di nos bishitantenan cu ta bin cu avion. “Bo mester tuma e tempo separa tambe pa reconoce e dinamica aki tambe.”

E directora ta haya importante cu e simposio aki semper nan ta combina cu un training den parti di atardi. Ademas e biaha aki e registracion pa e parti di training ta ‘hopi bon’. Nan ta miembro di e ekipo di compania of operador di turismo cu ta traha riba e veld mes. E ta haya cu e tipo di experiencia aki ta bunita pa wak con companianan ta percura cu henter nan ekipo ta haci uzo di e oportunidad aki. “Esaki nos ta hacie pa mehoracion di nos producto. Mehoracion di experiencia. Participacion di industria”, el a bisa. E participantenan tabata basta diverso entre nan representantenan di departamento di gobierno, compania di tour, restaurantnan, etc…

Cruise Manager di ATA
Di su banda, Mario Arends kende ta cruise manager di ATA, a indica cu 2017 ta un aña hopi bon pa industria di crucero na Aruba. E ta un record ariba di 750 mil turista crucero na 2017. E ta haya cu e crecemento ta bin mas tanto den e low season entre mei y september y no den high season. Esaki ta un strategia di ATA pa pusha mas crecemento den e temporada aki hunto cu APA cu incentivonan pa evita un tiki e congestion durante e temporada halto.

Sr. Arends ta bisa cu nan ta premira cu pa 2018 cu nos lo surpasa e 800 mil turista di crucero specialmente durante e low season. Un parti di e mensahe den e simposio aki tabata pa cada un di e socionan di ATA y operadornan di turismo presente ta cu nos mester keda ta creativo y haci nos best.

“Pa cada un di nos keda mehora ainda mas e experiencia di nos bishitante di crucero”, el a bisa. Tambe e investigacionnan cu nan a presenta a mustra cu e satisfaccion di e turistanan crucero ta hopi positivo tambe. Nan lo sigui enfoca riba calidad unda e impacto economico. E stigma cu tin riba e turista crucero cu nan ta un sorto di turista cu no ta gasta placa a cuminsa cambia. Sr. Arends ta kere cu e cifranan ta papia pa nan mes, ya cu e studio mas reciente cu ATA a haci ta indica cu un turista crucero ta gasta un averahe di 112 dollar. “Si bo multiplica pa e cantidad di turista nos ta wak cu e ta un cantidad significante”, el a bisa.

 

Proyecto Por City na Playa
Den cuadro di e simposio aki, Lex Ridder kebde ta chief commercial officer di ATA a haci un presentacion di e master plan di e desaroyo di e Port City na Oranjestad. Esaki caba ta canando formalmente fei di luna di mei ultimo unda e plan di proyecto di desaroyo urbano den e area a keda presenta pa Oever&Zaaler (OZ) Architects. E proceso di implementacion di henter e proyecto aki lo por tuma luga entre 15 pa 20 aña.

Igualmente e orador invita Amilcar Cascais kende ta consultant di industria crucero a elabora riba  “Con bira exitoso den industria crucero”. El a presenta tablanan cu a ilustra e desaroyo di e industria aki. Un total di 24,7 miyon di pasahero crucero global a keda registra na 2016. Esaki ta un aumento di un 7% compara cu e cifra record registra cu e aña anterior (2015). Mientras cu pa 2017 ta wordo calcula un total di 25, 8 miyon di pasahero crucero global. Ademas ta wordo pronostica cu e cantidad di pasahero crucero lo sigui crece.

 

You May Also Like

Citgo completamente hipoteca

E 49,9% restante di e accionnan di e empresa Mericano CITGO, propiedad 100% di ...

Interpol Aruba lo wordo institui prome di maart

Manera nos a trece dilanti siman pasa despues di a puntra minister encarga cu ...

5-11-16accpiedraplat (7).JPG

Accidente cu basta daño material na Piedra Plat

Diabierna anochi lat a sucede un accidente riba e caminda di Piedra Plat pa ...

Green Corridor

Borchinan lo wordo poni pa informa pueblo di Green Corridor

 Hopi cos tin di wordo haci pa asina e proyecto di green coridor keda ...

image.jpeg

Ultimo aña prome cu eleccion Mas promesa, nada concreto?

Gobernador Refunjol awe ta haci inauguracion di aña parlamentario nobo. Esaki no ta segun ...