Turistanan boluntario ta haci yamado pa responsabilidad general y solucion sostenibel pa crisis di animal

Segun cu Aruba ta debati con pa atende su crisis di animal di caya cu ta andando pa hopi tempo, agricultornan local y funcionarionan di gobierno cada bes mas ta punta dede riba esnan cu ta traha den rescate—acusando nan di ta crea e problema y hasta probecha di dje.

Hopi di e protectornan di animal cu ta traha riba e isla ta turista boluntario cu ta dedica tempo y recursonan personal. Den un entrevista cu algun turista boluntario, nan ta reacciona riba e declaracionnan aki aclarando cu e acusacionnan aki ta falso, dañino y ta distrae for di e asunto real: un maneho sin responsabilidad, aplicacion of planificacion a largo plaso.

Tres boluntario di rescate di hopi tempo—Allison Lindsey Wood, Annie Cooper y Ingrid Kabnick—a papia cu Bon Dia Aruba tocante e tensionnan creciente, e posible consideracion di gobierno pa reapertura di e killcage, y pakico nan ta kere cu e crisis di poblacion di animal di e isla lo solamente empeora sin cambio structural serio.

Recientemente cunukeronan a afirma cu boluntarionan di rescate y fundacionnan independiente ta “haci negoshi” y ta beneficia financieramente di e problema di animal riba caya. Tur tres boluntario di rescate a rechasa e acusacion aki como infunda y profundamente mal dirigi.

“Esaki ta absolutamente ridiculo,” segun Cooper, kende ta sirbi como miembro di directiva di Crossroads Animal Aid. “Ni un placa no ta bay den saco di ningun rescatista. Mayoria di rescate ta opera na perdida, invertiendo nan mesun placa y miles di ora sin pago.”

Wood, un turista Mericano cu ta boluntario cu diferente fundacion na Aruba, a haci echo di e sentimento. E ta bisa cu mientras cu protectornan di animal ta busca donacion pa yuda animalnan malo of herida, tur fondo ta ser contabilisa y nunca ta suficiente pa cubri gastonan completo.

“Cualkier cos mas hopi di loke nos ta ricibi den donacionnan, nos ta paga for di saco,” Wood a splica. “Den e ultimo luna so mi a recauda placa pa amputacion, casonan di venenamento, bringamento di cacho, bishita di emergencia na veterinario—hopi di cual mi a cubri mi mes.”

Kabnick, kende ta opera un organisacion sin fin di lucro cu sede na Merca cu ta traha den regionnan di riesgo halto incluyendo Aruba, a describi e trabao di rescate como puramente dirigi riba mision: “Rescate no ta un negoshi. Cuido medico, cuminda, transporte—tur esaki ta caro. E gastonan di adopcion ta cubri solamente un fraccion di e gastonan.”

Tur tres boluntario ta argumenta cu sin e trabao di e protectornan di animal, e crisis di animal di e isla lo ta mucho pio, no miho.

Den un declaracion na Bon Dia Aruba, presidente di Comision Pro Cunukeronan Arubiano a indica cu e protectornan y fundacionnan di rescate ta “encurasha” poblacionnan di cacho riba caya y a boga pa reapertura di e killcage. E boluntarionan protector ta bisa cu esey lo pone Aruba decadas atras, y alabes a señala cu e declaracion ta mal representa tanto nan trabao como e causa principal di e crisis.

“E asunto no ta e cacho— ta e doñonan,” Wood a bisa. “Tabatin un killcage pa mas cu 40 aña y ainda nos tabatin animal riba caya, negligencia, abuso, dumping, y cria di cacho y pushi descontrola.”

Cooper a bay di acuerdo, mustrando riba modelonan internacional: “Hulanda a elimina cacho riba caya pa medio di sterilisacion, registracion y aplicacion di ley—no eutanasia.” El a adverti cu trece back e killcage lo daña severamente e imagen di Aruba. “Bo por ta sigur cu Mericanonan pasiona manera ami lo haci tur esfuerso pa publica su resurgimento si esey sucede,” el a agrega.

Kabnick a yama e idea di reapertura di e killcage un paso atras: “Mata animal no ta haci nada pa atende cu e criamento iresponsabel, negligencia di doño, of falta di educacion. Prevencion, no matamento, ta e unico maneho humano y efectivo.”

Tur tres boluntario a enfatisa cu e existencia di e killcage pa decadanan no a haci nada pa mehora e condicionnan. Rescatistanan, nan ta bisa, no ta e fuente di e problema—nan ta esnan cu ta purba di contene esaki.

Recientemente, minister Arthur Dowers a declara cu e maneho actual di e boluntario y fundacionnan — sterilisa y pone e animal back riba caya—“no ta funciona y ta contra ley.” El insisti cu comunidad mester habri wowo y realisa cu pone animal drumi den algun caso ta e unico opcion.

E boluntarionan protector ta rechasa e conclusion aki, bisando cu sterilisacion ta e unico solucion proba a largo plaso, pero cu e mester ser haci consistentemente, riba un escala amplio, y sostene pa forsa di ley.

Wood a señala cu tin fundacionnan cu a sterilisa colectivamente decenas di miles di animal den apenas algun aña. “E cantidad di yiunan preveni ta den triyonnan,” el a bisa. “Con por yama e un posible reapertura di un killcage posiblemente progreso?”

Kabnick a argumenta cu sterilisacion ta fracasa solamente ora doñonan iresponsabel ta sigui permiti criamento descontrola: “Nos por sterilisa miles, pero si doñonan dump puppies, laga cacho cana rond, of nenga di castra nan, e ciclo ta ripiti.”

Cooper a agrega cu gobierno no por pretende cu sterilisacion “no ta funcionando” siendo cu nunca el a ser sosteni of financia completamente na e escala necesario: “Ki politica actual? Nunca mi no a mira financiamento significante di gobierno pa campañanan di sterilisacion.”

E boluntarionan ta bisa cu Aruba mester sigui loke organisacionnan mundial di bienestar di animal a recomenda pa añanan caba: aplica y forsa cumplimento di ley, educa comunidad, regula criador, y financia sterilisacion masal.

Un mensahe cu a resona den tur tres entrevista ta cu e reapertura di e killcage por tin consecuencianan severo pa Aruba su economia dependiente di turismo.

Wood a adverti cu bishitantenan Mericano—e grupo di turista mas grandi di Aruba—lo no tolera crueldad bira politica di gobierno. “Si hende haya sa cu gobierno kier soluciona esaki pa medio di matamento, turismo lo sufri,” el a bisa. “Esaki lo yega na medionan di comunicacion di Merca.”

Cooper a bay di acuerdo: “Kill Cage Comes Back to Aruba” ta un titular devastador. Miyones di amante di animal lo mir’e.”

Kabnick di su banda a bisa cu turistanan cu ta presencia e sufrimento di animal ya ta bay cas back traumatisa, y politicanan oficial di matamento lo amplifica e reaccion contrario.

Tur tres ta señala cu Aruba ta mercadea su mes como un destinacion sigur, acogedor; un killcage sosteni pa gobierno lo mina e imagen ey directamente.

Tanto Wood, Cooper y Kabnick a identifica un causa principal comparti: un falta completo di responsabilidad pa negligencia y abuso di animal.

“Legislacion sin aplicacion no ta efectivo,” Wood a cita for di e propio corespondencia di ex-Prome Minister Evelyn Wever-Croes cu Humane Society International. El a comparti ehempelnan di cacho morto cu a keda den cura, casonan di venenamento, y informenan di abuso cu no a ricibi ningun respuesta di polis.

Cooper a enfatisa e peliger a largo plaso: “Ta un hecho proba cu un hende cu ta abusa di animal tin mas chens di haci daño na un persona. Esakinan no ta hendenan cu bo kier den bo barionan.”

Kabnick a agrega cu soluciona abuso ta rekeri visibilidad y educacion. “Mundo mester sa kico ta pasando. Abuso no ta un problema isola—e ta sistematico, y e ta daña e reputacion di e isla mescos cu su animalnan.”

Tur tres boluntario ta di acuerdo cu Aruba mester di: aplicacion estricto di leynan existente; rekisitonan di registracion pa tur animal di cas; regulacion y licencia di criadonan; boet y castigo pa doñonan cu ta laga cacho rond of cu ta dump nan riba caya; programanan di educacion pa mucha y famianan; y un asociacion activo di gobierno cu organisacionnan di rescate

Mientras cu e tres boluntario ta bini di diferente antecedente, nan tur ta di acuerdo riba e solucion: un strategia coordina, sosteni pa gobierno, a largo plaso cu ta hancra den sterilisacion, educacion y aplicacion.

Nan ta bisa cu Aruba mester sigui e miho practicanan internacional, entre otro: sterilisaci n masal consistente; responsabilidad di doño y boetnan; leynan di bienestar di animal fortaleci; programanan accesibel pa famianan di entrada abao; y colaboracion entre fundacionnan, polis, y gobierno.

Manera Wood a bisa bon cla: “Bo por mata cuanto cacho cu bo kier, pero te ora cu hende ser teni responsabel, e problema lo no cambia nunca.”

Cooper a agrega: “Cambio real no por depende di boluntario so. Gobierno mester tuma propiedad.”

Kabnick a conclui: “Mata animal lo no drecha loke hende ta causa. E unico caminda pa sigui ta prevencion, compasion y responsabilidad.”