Durante e debate plenario di Comision di Relacionnan di Reino di Tweede Kamer, dia 14 di mei ultimo, parlamentario Mpanzu Bamenga (D66) a entrega un mocion exigiendo aplicacion di legislacion ambiental den parti Caribense di Reino Hulandes. Den e mocion, e ta solicita gobierno pa promove cooperacion regional entre Bonaire, Aruba y Corsou den area di procesamento di desperdicio.
Durante e debate, e parlamentarionan den e comision a delibera tocante e situacion na e dump na Lagun, opera pa e compania di procesamento di desperdicio Selibon na Bonaire. Nan a nota cu e situacion ta presenta un menasa serio contra tanto salubridad publico di e residentenan den e area, y e ambiente natural riba e isla.
Den e mocion entrega pa Bamenga, y firma tambe pa parlamentarionan Faith Bruyning (NSC), J.P. van Haasen (PVV), Don Ceder (CU), y Aukje de Vries (VVD), ta nota cu tur otro isla den parti Caribense di Reino ta enfrentando problema cu maneho di desperdicio, cu efectonan similarmente dañino riba nan medio ambiente.
“Considerando cu un solucion structural y sostenible ta necesario pa procesamento di desperdicio na Bonaire pa preveni situacionnan similar den futuro; ta solicita gobierno pa promove cooperacion regional entre Bonaire, Aruba y Corsou den e area di maneho di desperdicio lo mas posible,” e mocion ta bisa, “y mediante e maneho aki, pa crea un economia circular conhunto riba e islanan.”
E mocion ta agrega ademas e solicitud pa aplica e lesnan cu a siña for di e solucionnan riba e islanan di Aruba, Bonaire y Corsou, na e islanan di Sint Eustatius, Saba y Sint Maarten, cu ta enfrenta problemanan similar.
