Un nota parlamentario publica siman pasa den respuesta na pregunta di diferente partido politico a reinicia e debate tocante modernisacion di e Ley di Reino riba ciudadania Hulandes. E propuesta, entrega pa parlamentarionan Paternotte y Mutluer, tin meta pa haci cambionan amplio na e ley di ciudadania Hulandes.

Den centro di e discusion tin a abolicion di e obligacion pa renuncia e nacionalidad original di un persona na momento di adkiri nacionalidad Hulandes, como tambe e prevencion di perdida no intencional di nacionalidad Hulandes. E propuesta tambe ta busca pa elimina obligacionnan di tratado cu actualmente ta restringi nacionalidad multiple.

Den un carta, fecha 22 di augustus 2025, ta delinea e argumentonan di e iniciadornan den detaye mientras ta atende preocupacion expresa pa varios partido politico. Den curason di e debate tin pregunta tocante lealtad, integracion, peso administrativo y e balor di nacionalidad Hulandes den un mundo cada bes mas globalisa.

Elimina rekisito di renunciamento

Un di e aspectonan mas significante di e propuesta ta e eliminacion di e “afstandplicht,” e obligacion di stranheronan cu kier bira Hulandes pa renuncia nan nacionalidad original. E ley actual tambe ta obliga ciudadano Hulandes bibando den exterior pa renuncia nan nacionalidad Hulandes si nan adkiri otro nacionalidad boluntariamente. E iniciadornan di e propuesta ta argumenta cu e reglanan aki hopi biaha ta conduci na situacionnan indeseable, manera hende perdiendo nan nacionalidad Hulandes sin intencion. E cambio proponi lo stop e perdida automatico aki.

Partido BBB a expresa preocupacion fuerte, argumentando cu eliminacion di e obligacion di renuncia ta bay permiti cualkier persona mantene nacionalidad multiple indefinidamente, loke nan ta considera indeseable. Nan a sugeri un compromiso, den cual e nacionalidad Hulandes ta caduca despues di un cantidad stipula di aña si a adkiri otro nacionalidad.

E iniciadornan a rechasa e propuesta aki, citando motibonan tanto practico como di principio. Nan a nota cu anteriormente Ombudsman a haya cu mal comunicacion di gobierno a resulta den hopi ciudadano Hulandes den exterior perdiendo nan nacionalidad sin cu nan a realisa esaki. E iniciadornan a argumenta cu lealtad y identidad no ta reduci door di nacionalidad multiple y cu cualkier forma di rekisito di renunciamento ta keda problematico.

Lealtad y integracion

E discusion tocante lealtad ta den henter e documento. VVD y BBB ta preocupa cu nacionalidadnan multiple por mina e sentido di pertenece y ta leal na Hulanda.

Nan ta teme cu hende por tin derecho di voto na varios pais sin laso significante, y cu inmigrantenan por integra menos completamente si no ta rekeri nan pa renuncia nan nacionalidad original.

E iniciadornan di nan banda a punta riba investigacion, incluyendo estudio di Wetenschappelijke Raad voor Regeringsbeleid (WRR), mustrando cu nacionalidad multiple no ta debilita lealtad. Al contrario, nan ta argumenta, por reforsa integracion ora hende no mester entrega nan nacionalidad original. Hende cu dobel nacionalidad hopi biaha ta sinti mas na cas na Hulanda, ta siña e idioma mas lihe y tin mayor probabilidad di participa den sociedad. E iniciadornan ta describi e rekisito di renunciamento como restriccion riba integracion en bes di sosten pa esaki.

ChristenUnie a duna otro forma na e debate, enfatisando cu ciudadania Hulandes ta inclui no solamente e derecho, pero tambe e obligacionnan dentro di un comunidad di balornan. Nan ta preocupa tocante tension potencial ora hende tin nacionalidad di paisnan cu balornan fundamentalmente diferente.

E iniciadornan a reconoce e importancia di balornan, pero a resalta cu e procedura di ‘inburgering’ ya ta sigura cu e ciudadanonan Hulandes nobo ta adopta balornan central di sociedad Hulandes. Nan a argumenta cu identidad Hulandes no ta limita na residencia dentro di Hulanda, citando ehempel di Hulandesnan den exterior cu ta keda profundamente conecta na e nacion.

Tratado internacional y Convencion Strasbourg

Otro problema mayor expresa den e nota ta trata obligacionnan internacional. E propuesta ta sugeri retiro for di Capitulo I di e Convencion Strasbourg di 1963, cu ta limita nacionalidad multiple, y for di su di Dos Protocol. Actualmente, solamente Hulanda y Austria ta keda mara pa Capitulo I di e tratado, y solamente Hulanda y Italia pa e di Dos Protocol. E iniciadornan ta argumenta cu sali di e tratado lo elimina restriccionnan innecesario y trece ley Hulandes den linea cu practicanan di mayoria di estado Europeo. Nan ta splica cu hopi pais Europeo ya a bandona e regla di un solo nacionalidad y ta permiti ciudadania multiple, cu Alemania cambiando su ley recientemente den e aspecto aki.

Segun e iniciadornan, elimina e obligacionnan di tratado aki lo tin efecto principal riba ciudadano Hulandes cu ta adkiri nacionalidad Austriaco of Italiano. Bao di e sistema actual, e individuonan aki ta perde nan nacionalidad Hulandes automaticamente. Si sali di e tratado, nan lo por keda cu tur dos nacionalidad.

Costo administrativo y consecuencia practico
 E consecuencia financiero y administrativo di e cambio proponi tambe ta considera den detaye. Door di elimina e obligacion pa renuncia otro nacionalidad, Servicio di Inmigracion y Naturalisacion (IND) no lo mester conduci practica di retiro of evaluacion di proporcionalidad mas. Esaki lo spaar aproximadamente 908.600 euro anualmente, ekivalente na 12 posicion full-time.

Sinembargo, e cambio por conduci na un aumento den solicitud di naturalisacion. Basa riba calculacionnan anterior, un aumento di 3 porciento (alrededor di mil solicitud adicional anualmente) lo costa 420mil euro. E iniciadornan a conclui cu ta spaar mas di loke e costo adicional lo bira.

IND tambe lo evita casonan complica y hopi biaha doloroso den cual ciudadanonan Hulandes ta perde nan nacionalidad sin intencion. E situacionnan aki a genera desatisfaccion y critica amplio, incluyendo for di Ombudsman. E iniciadornan ta argumenta cu preveni perdidanan asina no solamente ta reduci burocracia sino tambe ta protege derecho di ciudadanonan.

Recuperando nacionalidad Hulandes
 E nota ta resalta e opcion nobo den procedura introduci pa ex-ciudadano Hulandes.
Actualmente, recupera nacionalidad Hulandes despues di a perd’e imboluntariamente ta extremadamente dificil. E veredicto Tjebbes di Corte Europeo di Husticia na 2019 tabata rekeri chekeo di proporcionalidad ora ta perde un nacionalidad Europeo, pero den practica, apenas un man yen di hende a recupera nan nacionalidad Hulandes exitosamente bao di e reglanan aki. Na 2022, apenas 4 porciento di alrededor di 750 solicitud tabata exitoso.

E procedura nobo lo simplifica e proceso door di permiti ex-ciudadano Hulandes, sea ta biba na Hulanda of den exterior, pa aplica pa reinstalacion directamente na municipalidad y puesto diplomatico. Esaki, segun e iniciadornan, lo alinea ley Hulandes cu e principio di un estado legal responsivo y reforsa su lasonan cu hende Hulandes rond mundo.

Perspectiva politico
 Diferente partido den Tweede Kamer a responde di maneranan hopi diferente.
VVD y BBB a enfatisa e riesgo di lealtad debilita, multiple derecho di voto, y aplicacionnan masivo.

ChristenUnie a subraya e importancia di un ciudadania basa riba obligacion y balornan.
CDA a trece pregunta tocante estadistica, e cantidad di hende cu a perde nacionalidad, con ta provee informacion. Nan tambe a puntra con hopi hende ta recupera nan nacionalidad cada aña, cual e iniciadornan a splica cu e cifranan ta limita y e proceduranan ta restrictivo.

Volt a mustra sosten fuerte pa e propuesta, elogiando e pa reconoce identidad multiple den un sociedad globalisa, y mirando e como refleho di diversidad cultural.

SP a enfoca riba e implicacionnan di sali di e Convencion Strasbourg y a puntra tocante comparacionnan internacional. E iniciadornan a responde cu maske no tin evaluacion recien, hopi pais Europeo ya a adopta nacionalidad multiple.

Implicacion amplio
 E iniciadornan ta argumenta cu reforma ley di nacionalidad no ta bay solamente tocante derecho individual sino e interesnan colectivo di Hulanda. Perdida automatico di nacionalidad ta kibra laso cu hende cu por retene conexionnan social, cultural of economico fuerte cu Hulanda. Esaki ta dañino no solo pa e individuonan aki pero ta priva e pais di red y experticio internacional valioso. Nan ta nota cu ex-ciudadano Hulandes cu kier bolbe Hulanda ta enfrenta obstaculo innecesario, mientras e sistema actual tambe ta limita e habilidad di e estado pa duna asistencia consular na ciudadano Hulandes den exterior.

Den nan opinion, e propuesta lo reverti e efectonan negativo aki door di permiti nacionalidad multiple, simplificando procesonan administrativo, y preservando conexion cu ciudadano Hulandes rond mundo.