Recientemente e website investigativo Follow the Money a publica un articulo den cual ta indica cu segun un investigacion parti Caribense di Reino ta fungi como base pa tanker cu petroleo di Rusia y Iran. Relaciona cu esaki miembronan di Tweede Kamer Jan Paternotte (D66) y Derk Boswijk (CDA) a manda algun pregunta na e Minister di Asuntonan di Hulanda, Caspar Veldkamp y e Secretario di Estado di Asuntonan di Interior y Relacionnan den Reino, Eddie van Marum.

Segun e articulo autoridadnan occidental ta hayando dificil pa evita efectivamente exportacion di petroleo di Rusia y Iran. Mediante un “flota scondi” di tanker, ambos pais ta evadiendo sancionnan internacional – hopi biaha literalmente door di nabega bao bandera falso. E investigacion di Follow the Money ta revela cu Hulanda ta para na banda sin por haci nada mientras alrededor di 90 tanker ta bula falsamente e bandera di Aruba, Corsou of Sint Maarten – paisnan parti di Reino Hulandes, pero sin nan propio registro oficial di barco.

E miembronan di Tweede Kamer, Paternotte y Boswijk a puntra e Minister y Secretario di Estado primeramente si nan ta na altura di e articulo caminda ta ser describi cu decenas di tankers di e flota Ruso ta nabega bou di bandera di Aruba, Corsou of Sint Maarten, y con nan ta evalua e hecho cu e paisnan Caribense den Reino Hulandes ta ser usa pa transporta petroleo Ruso bou di bandera falso y asina evita sancionnan internacional.

E parlamentarionan a puntra tambe si nan [Minister Veldkamp y Secretario di Estado van Marum] ta di acuerdo cu e situacion aki ta causa dañonan serio na e imagen y credibilidad di Reino y ki medida nan ta considera pa combati esaki.

Paternotte y Boswijk a puntra si e Minister y Secretario di Estado ta di acuerdo cu evadi sancionnan via registro maritimo Caribense ta inaceptabel, ta yuda paisnan manera Rusia y Iran y ta mina e regimen di sancionnan internacional.

E miembronan di Tweede Kamer ta puntra Minister Veldkamp y Secretario di Estado van Marum si den nan opinion, tin suficiente visibilidad den Hulanda y e otro paisnan den Reino riba e cantidad di barconan cu bandera Caribense cu ta registra actualmente y ta transporta petroleo pa Rusia of Iran.

E parlamentarionan a puntra tambe ki pasonan e Gabinete a tuma desde e introduccion di e sancionnan di Union Europeo (EU) pa preveni cu barconan cu ta drenta cu un bandera di un di e paisnan di e Reino ta ser usa pa e “flota scondi” di Rusia, y ki medidanan adicional Hulanda ta tuma hunto cu Aruba, Corsou y Sint Maarten pa sigura control mas estricto riba registro di barconan y cumplimento di sancionnan internacional.

Den e articulo Paul Ellinger di e inspectorado di barco na Sint Maarten ta indica cu “cos a bira hopi malo” y cu “awor nan ta registrando barconan completo: tanker di petroleo, barco di carga”, pues tur tipo di barco.

Den e articulo ta menciona tambe cu Ellinger ta enfrentando cada bes mas pregunta di autoridadnan internacional. Su oficina ta ricibi reportahenan tocante tankernan supuestamente registra na Sint Maarten, mientras su isla no tin manera pa emiti documentonan asina.

Relaciona na esaki, e parlamentarionan Paternotte y Boswijk ta remarca cu teniendo na consideracion cu e gobierno di Sint Maarten ta indica cu nan no tin capacidad pa haci investigacion riba barconan afo di nan awa teritorial y cu e risiconan cu e “flota scondi” Ruso ta sigui existi, nan ta puntra kico ta e plan di Hulanda pa duna sosten na e otro paisnan den Reino, y si nan ta dispuesto pa wak tambe riba posibilidad di forma of fortifica un registro maritimo propio cu miho supervision.

E miembronan di Tweede Kamer a puntra tambe si Hulanda tin posibilidad legal pa inspecciona, detene of anula e registro di barconan cu ta nabega bou di bandera di Aruba, Corsou of Sint Maarten cu ta evadi sancionnan.

Por ultimo, e parlamentarionan a indica cu teniendo na consideracion cu segun e articulo, companianan maritimo Occidental a bende barconan bieu na partinan dudoso cu eventualmente a bira parti di e “flota scondi”, nan ta puntra ki posibilidad gobierno ta mira pa mehora monitoreo y regula e benta di barconan bieu na paisnan tercero.

Maske Sint Maarten, Aruba y Corsou no por emiti registro legal di barco, al menos nobenta tanker di petroleo y gas actualmente ta bula bao nan bandera. Esaki ta registracionnan falso, yudando fuel un red masivo y ilegal di contrabanda. Aproximadamente tres cuarta parti (73 di e 92 barco identifica) ta transportando petroleo di Iran of Rusia. Casi mita (39) ya ta riba lista di sancion Occidental.

Cada cargamento ta bal decenas di miyones di dollar, y segun Departamento di Tesoro Mericano, e placa hopi biaha ta yega gruponan manera Hezbollah, e Guardia Revolucionario Irani, e rebeldenan Houthi na Yemen, y hasta e mashin di guera Ruso.

Pasobra e islanan di Caribe en cuestion ta parti di Reino Hulandes, e operacion aki cu bandera falso ta mancha e reputacion internacional di Hulanda, a pesar cu e gobiernonan no tin control riba e barconan aki.

Barconan sin registro valido y sin bandera reconoci ta efectivamente sin estado. Esaki ta nifica cu no por sigura nan, nan ta opera sin supervision maritimo, no ta suheto na inspeccion di seguridad, y ta presenta un riesgo ambiental y di seguridad.

En efecto, esakinan ta bom flotante. Desde 2012 (Iran) y 2022 (Rusia), mientras sancionnan a bira mas fuerte, contrabandistanan a cuminsa usa “bandera di conveniencia” emiti pa estadonan cu aplicacion maritimo debil – manera Gabon, Palau y Togo. Mientras cu e paisnan aki ta rekeri pa check cumplimento, aplicacion ta poco exigente. Loke ta nobo y alarmante ta e cambio na pais of teritorio manera Sint Maarten, cu absolutamente no tin registro di barco. Toch tanker ta nabega cu documento bisando cu nan ta registra eynan.

Na april 2024, Hulanda a adverti IMO tocante certificadonan fraudulento cu ta bisa di bin for di Sint Maarten. Na januari 2025, explicitamente a nombra MSTA. Pero e advertencia a yega mucho laat: ya pa e tempo ey, MSTA a expande den registro di tanker.

Ministerio di Infrastructura Hulandes ta admiti cu nan no sa cuanto documento falso ta existi, y nan no tabata na altura cu mayoria di e tanker involucra ta pertenece na e flota scondi cu ta evadiendo sancion.

“Tur teritorio di Reino ta cada bes mas plaga pa certificado falso,” segun un vocero di e ministerio.

Di su banda, IMO ta bisa cu e paisnan mes mester tuma accion. Pero experto Ian Ralby ta critica IMO pa no tin blacklist of whitelist, cu ta hacie mas dificil pa detecta fraude.

Paul Ellinger di Sint Maarten ta bisa cu decenas di marinier estafa pa MSTA (Maritime Safety & Technical Administration)a acerca nan pa ayudo. “Esaki ta dañando e nomber di nos pais. Y ya cu nos ta parti di Reino Hulandes, ta mancha henter e Reino.”

Experto di ley maritimo, Frank Stevens di Universidad Erasmus ta di acuerdo. “Esaki por bira un problema mayor pa gobierno Hulandes. Estadonan bandera legitimo no kier estafadornan bendiendo nan bandera.”

Pero e ministerio Hulandes ta keda relativamente sin preocupacion. “E hecho cu nos ta reportando fraude activamente ta mehora nos reputacion den e sector aki.”

Nan tambe ta insisti cu e responsabilidad di cumplimento ta cay riba Sint Maarten mes – un posicion reta pa e isla, cu ta bisa cu no tin capacidad pa investiga crimen fuera di su fronteranan.